Pavarësisht vendimit të Valentina Leskajt për të dërguar mandatin e saj në Gjykatën Kushtetuese, një kusht ky i opozitës për të sjellë normalitetin në parlament, kjo nuk ka mjaftuar që demokratët të vendosin ndryshe.
Në seancën parlamentare të kësaj të enjteje, deputetët e opozitës kanë bllokuar foltoren e parlamentit. Pak më parë, kreu i grupit parlamentar tha se Kryeministri Edi Rama tentoi të mashtronte edhe komisionerin Hanh kur i tha atij se do të çonte në Gjykatën Kushtetuese për interpretim, vetë vendimin e kësaj gjykate.
“ Ne tashmë jemi mësuar me dy pamjet e Ramës, atë të lëpirësit me huajt dhe të arrogantit me opozitën dhe qytetarët. Sy më sy dje u mundua ta mashtrojë edhe Hahn, kur i tha se vendimin e gjykatës kushtetuese do ta dërgojë në Gjykatën Kushtetuese për shqyrtim dhe interpretim. Ka hipokrizi e cinizëm më të madh, që të flasësh për reformë në drejtësi, në një kohë që Rama urdhëron deputetët e tij të shkelin vendimet e Gjykatës Kushtetuese?!”- tha Paloka.
Në kundërpërgjigje kreu i grupit parlamentar socialist i kërkoi Metës që të ndërhynte për të liruar foltoren. Sipas Gramoz Ruçit, është një puç nga ana e opozitës që të bllokohet foltorja e Kuvendit.
“Përfaqësuesi i opozitës ngriti këtu disa probleme. Sigurisht që edhe ne kemi mendimet tona, kështuqë do t’ju kërkoja juve dhe grupit të opozitës që të zënë vendet dhe të dëgjojnë kundërshtarët politik. S’ka puç më të madh sesa të mos lejosh fjalën e lirë në një parlament demokratik” – tha Ruçi.
