Operatorë me origjinë ruse kryejnë veprimtari ekonomike në sektorë të ndjeshëm si komunikimi elektronik dhe mirëmbajtja e faqeve online në Shqipëri dhe në rajon. Është ky shqetësimi i ngritur nga kreu i komisionit të dezinformimit, Erion Braçe, sipas të cilit boshllëku ligjor nuk i lejon që të reagojnë.
“U evidentua që ka boshllëk ligjor që ky autoritet ligjor të merret me mbylljen e këtyre adresave. Kemi kërkuar që institucionet të verifikojnë qenien e individëve apo zbatimin e sanksioneve të individëve që kryejnë veprimtari ekonomike në Shqipëri dhe në rajon. Funksionimi i operatorëve ekonomikë me origjinë Rusinë në sektorë të ndjeshëm si komunikimi elektronik apo ndërtimi e mirëmbajtja e ëebfaqeve që emetojnë lajme në Republiknë e Shqipërisë”.
Braçe ka ngritur edhe shqetësimin e numrave të celularëve që përdorin fëmijët, duke qenë se nuk janë në emër të tyre. Sipas tij është shumë i vështirë identifikimi dhe mbrojtja e kësaj kategorie në komunikimet e ndryshme, ndaj për këtë arsye u është sugjeruar kufizimi në internet.
“Kemi verifikuar që numrat e telefonit që përdorin fëmijët nuk janë në emrin e tyre dhe institucionet kanë një vështirësi të jashtëzakonshme për t’i verifikuar dhe mbrojtur komunikimet e fëmijëve. Është bërë e vështirë për ministrinë e policinë që të mbrojë këtë kategori, se numrin e telefonit e blen babi apo mami dhe të gjithë e dinë që e përdorin këta, ndërkohë që i është dhënë një fëmije. Ajo që na u sugjerua nga Ministria e Brendshme është identifikimi i këtyre numrave të telefonit pra e bleu babi për fëmijën dhe të thotë dhe të ketë akses të kufizimit në internet për atë numër telefoni. Janë një seri instrumentash me të cilat ne po njihemi dhe në të 4 shtyllat e komisionit dhe në fund duam përgjigje të qartë”.
/a.r
