Presidenti i Turqisë, Recep Tayyip Erdogan, ka konfirmuar se gjashtë gylenistët e dëbuar nga Kosova janë në Turqi. Ata pritet të procedohen nga gjykatat turke që parimisht i sheh terroristë gylenistët. Siç raporton Anadoulu Agency, medie kjo e Erdoganit, “ekstradimi” nuk kaloi nëpër asnjë procedurë ligjore. Erdogan flet për bashkëpunimin me autoritetet e Kosovës për t’i kapur gylenistët të cilët i konsideron terroristë.
“Së fundmi, Agjencia jonë Kombëtare e Inteligjencës, në bashkëpunim me inteligjencën e Kosovës kapën gjashtë përfaqësues të lartë të FETO-s në Ballkan, i sollën dhe ua dorëzuan organeve policore. Ne kemi thënë se ata do të ikin, kurse ne do t’i ndjekim dhe sjellim këtu me lejen e Zotit kudo që gjenden. Do të kërkojmë llogari”, ka thënë Presidenti Erdogan.
Në Kosovë dje në mënyrë misterioze u arrestuan gjashtë shtetas turq, drejtues dhe profesorë të Kolegjit “Mehmet Akif” kokat e të cilëve po i kërkonte pushteti i Erdoganit prej 2016-s kur ndodhi tentim puçi ndaj tij, e pas të cilit presidenti turk thotë se qëndron organizata FETO.
Presidenti, kryeministri dhe kryeparlamentari i Kosovës thanë dje se nuk ishin të informuar për operacionin e arrestimit të gylenistëve, që gjeresisht po konsiderohet si operacioni më i turpshëm i shtetit të Kosovës.
Për shkak të këtyre arrestimeve, kryeministri Ramush Haradinaj shkarkoi ministrin e Punëve të Brendshme, Flamur Sefaj dhe shefin e AKI-së, Driton Gashi, si urdhërdhënës të rrembimit dhe dëbimit të shtetasve turq.
ma.me
