Pas shpalljes në kërkim nga prokuroria, Klement Balili ka vendosur të jetojë në arrati.
Burime nga policia i thanë ABC News se nuk ka asnjë komunikim me njerëz të afërt me Balilin për të bërë të mundur vetëdorëzimin e tij pranë autoriteteve.
Nuk ka asnjë gjurmë nga Kelment Balili disa ditë pasi u shpall në kërkim me vendim gjykate. Burime nga policia thanë se Balili mund të konsiderohet një person në arrati, sepse nuk ka asnjë negociatë as me policinë dhe as me prokurorinë per t’u vetëdorëzuar.
Zyrtarë të lartë të policisë thanë për ABC News se nuk ka asnjë përpjekje të Klement Balilit, ish-drejtor i Transporteve në Sarandë për të bashkëpunuar me policinë apo organin e akuzës. Disa ditë më parë, Balili mund të konsiderohet i shpallur në kërkim nga uniformat blu. Prokuroria ka caktuar masën e sigurisë “arrest me burg”, për personin që mediat greke e pagëzuan si Eskobari i Ballkanit. 44 vjeçari akuzohet nga autoritetet greke se drejton një grup të strukturuar kriminal. Drejt autoriteteve shqiptare u dërgua një dosje voluminoze prej 10 mijë faqesh me akuza që rëndojnë ndaj Kelmend Balilit.
Pak ditë pasi dosja mbërrin në Prokurori, në orët e para të mëngjesit të datës 10 Dhjetor, rreth 200 forca të policisë së shtetit zhvilluan një operacion për kapjen e të ashtëquajturit “Eskobari i Ballkanit”. Nga ky operacion u bë e mundur kapja e mikut të tij, 36-vjeçarit Berti Dosti, ndërsa u sekuestruan 2 armë.
Në Maj të këtij viti, u zbulua se Klement Balili ishte një prej organizatorëve të trafikut të kanabisit, nga Shqipëria drejt Greqisë. Në aksionin ku mori pjesë DEA Amerikane dhe forcat e policisë greke u kapën 700 kilogramë hashash dhe u arrestuan të gjithë drejtuesit e organizatës kriminale, përveç Klement Balilit që fshihej në Sarandë. /a.m.
