Këshilli i Sigurimit i OKB-së pritet të mblidhet në një takim urgjent të hënën për të diskutuar operacionet e SHBA-së në Venezuelë, pas kapjes së presidenti të Venezuelës, Nicolas Maduro dhe gruas së tij.
Takimi thuhet se është caktuar për në orën 10:00 të mëngjesit sipas orës lokale dhe do të përfshijë ambasadorë nga 15 vende në selinë e OKB-së në New York City, sipas Washington Examiner.
Kjo vjen pasi takimi u kërkua të shtunën nga presidenti kolumbian Gustavo Petro dhe ministri i jashtëm venezuelian Yvan Gil.
“Në përgjigje të agresionit kriminal të kryer nga qeveria amerikane kundër kombit tonë, ne kemi kërkuar një takim urgjent të Këshillit të Sigurimit të Kombeve të Bashkuara, organit përgjegjës për ruajtjen e ligjit ndërkombëtar. Asnjë sulm frikacak nuk do të mbizotërojë kundër forcës së këtij populli, i cili do të dalë fitimtar”, shkroi Gil në X.
