Një 38 vjeçar është arrestuar sot në Lushnje në kuadër të operacionit ndërkombëtar antidrogë të koduar “NADIR”. Hetimi përbashkët i policisë shqiptare me Policinë italiane dhe Karabinierinë e Kompanisë Roma Centro ka bërë të mundur të ndiqen penalisht 31 persona prej të cilëve 12 janë arrestuar në flagrancë.
“Në orët e para të mëngjesit të sotëm është bërë i mundur arrestimi njëkohësisht në Itali i 6 shtetasve shqiptarë, 1 italian dhe 1 rumune rezidentë në Itali dhe në Shqipëri i një shtetasi shqiptar Mario Ç, 38 vjeç, nga Lushnja me akuzën e pjesëmarrjes në organizatë kriminale dhe trafikim të lëndëve narkotike” njofton policia.
Grupi kriminal tregtonte drogë në sheshet kryesore të Lacios dhe Pulias
Policia bën me dije se grupi kriminal ishte i përbërë nga shqiptarë dhe italianë të angazhuar në trafikun e lëndëve narkotike të llojit kokainë e importuar nga Spanja dhe Holanda për ta tregtuar në sheshet kryesore të zonës së Lacios dhe Pulias.
Policia e Shtetit në bashkëpunim dhe në koordinim të plotë me Policinë italiane Zyrën Interforcë, prezente në Shqipëri dhe me kolegët e Karabinierisë në Romë, nëpërmjet kanaleve të komunikimit të drejtpërdrejtë të dy Policive ka bërë të mundur që në shtetin italian të lëshohen urdhër arrestet ndaj 11 personave, 8 prej të cilëve në burg dhe tre në arrest shtëpie me akuza të trafikut të lëndëve narkotike.
Sekuestrohet kokainë, hashash dhe euro cash
Gjatë operacionit antidrogë të koduar “NADIR” janë sekuestruar 4 kilogramë Kokainë e pastër, 1 kg hashash dhe 36 mijë euro ‘cash’.
Ky grup kriminal, sipas policisë, trafikonte sasi të konsiderueshme kokaine të pastër, e cila transportohej nga korrierë të përzgjedhur, mes të cilëve të rinj pa precedentë penalë.
Droga më pas tregtohej në zonat e Romës, Frozinones e në Foxha.
Dy organizatat policore janë duke punuar intensivisht për kapjen e elementëve të tjerë të përfshirë në trafik dhe për shkak të sekretit hetimor nuk bëjmë me dije të tjera informacione.
Policia e Shtetit bën me dije se është e angazhuar maksimalisht në goditjen e grupeve kriminale si brenda ashtu edhe jashtë vendit duke u mbështetur nga partnerët e saj dhe duke dhënë siguri në një bashkëpunim të besueshëm dhe të suksesshëm.
