Zëvendësdrejtori i Përgjithshëm i Policisë së Shtetit, Ardian Çipa, ka deklaruar se është mbyllur me sukses një nga operacionet më të gjerë kundër trafik në rajonin e Ballkanit.
Në konferencën për shtyp, Çipa deklaroi se hetimet kanë nisur më 2015 dhe kanë vazhduar për 15 muaj. Ai shtoi se operacioni ka qenë një bashkëpunim i madh midis policive e prokurorive të disa vendeve, përfshirë edhe SHBA.
Më 6 e 7 shkurt, janë bërë disa arrestime në qytete të ndryshme të Shqipërisë.
Në Shqipëri janë arrestuar 14 persona dhe dy të tjerë janë në kërkim. Në Greqi janë 10 të arrestuar e po aq në kërkim. Operacioni policor është zhvilluar edhe në Maqedoni e Bullgari.
Të arrestuar për përfshirje në trafik janë biznesmenët Jurgen Molla, i njohur edhe si Miri Molla, bashkëpronar i Molla SHPK. Shyqyri Kotorri, Anesti Koromani investitor në fushën e ndërtimit, Nuredin Nazëraj pronar i një hoteli në Vlorë, Lulzim Qorri, Denis Sinamati dhe një biznesmen nga Kosova.
Sipas Çipës, janë kapur 1.8 kilogramë kokainë e 22.6 kilogramë heroinë.
Ndër të tjera Cipa tha se organizatorët janë nga Turqia. “Është kapur një sasi e madhe droge. Persona të tjerë organizator janë nga Turqia, dhe nga Kosova.”, tha Cipa.
Kreu e Prokurorisë së Krimeve të Rënda Adnan Xholi deklaroi se do të vijojë hetimi dhe dokumentimi i këtij rasti trafikimi.
“Krahas dokumentimit të kësaj vepre, prokuroria për krimet e renda për vijim do vijojë të kryejë me veprime të tjera që ka të bëjë me aplikim të masave ndaluese dhe parandaluese. Gjej rastin të shpreh vlerësimet e mia për gjithë angazhimin e strukturave të Policisë së Shtetit, bashkë me prokurorë dhe oficerë në këtë rast, duke vlerësuar punën e tyre. Si drejtues i prokurorisë për Krimet e rënda, i shpreh Policisë së Shtetit angazhimin tonë, për këto çështje.”, tha Xholi.
Ndër të tjera Çipa është pyetur edhe për grabitjen në Rinas, ndërsa ai e cilësoi atë një ngjarje të rëndë. Çipa tha se çështja është në hetim. “Policia është e angazhuar për të zbardhur ngjarjen dhe këtë rast të rëndë. Autorët janë shpallur në kërkim.”, tha Çipa.
n…
D.I.
