Një megaoperacion antidrogë është zhvilluar pak pas mesnatës në disa qytete të qarkut të Elbasanit, duke çuar në arrestimin e 40 personave të përfshirë në veprimtari të paligjshme të prodhimit dhe trafikimit të lëndëve narkotike.
Deri më tani mësohet se gjatë operacionit, i cili është zhvilluar njëkohësisht në qytetet Prrenjas, Librazhd, Gramsh, Peqin, Cërrik, Belsh dhe Elbasan, policia ka sekuestruar: Të paktën 3 armë zjarri automatike të tipit kallashnikov, pistoleta si dhe lëndë narkotike, të ndara në disa lloje.
Operacioni i befasishëm kishte në fokus goditjen e një rrjeti kriminal të organizuar, që dyshohet se ishte i përfshirë në kultivimin, përpunimin dhe trafikimin e drogës, si dhe mbajtjen pa leje të armëve të zjarrit.
Hetimet pritet të zgjerojnë edhe më tej rrethin e personave të përfshirë, ndërsa më shumë detaje mbi operacionin pritet të bëhen publike nga Policia e Shtetit në një konferencë për mediat gjatë ditës së sotme.
Ky është një nga operacionet më të mëdha të kryera këtë vit në territorin e qarkut Elbasan, një zonë që prej vitesh ndodhet nën vëzhgim të shtuar për aktivitetet kriminale të lidhura me narkotikët.
