Çmimi i naftës vijon të njohë vetëm ulje në tregjet ndërkombëtare. Për të shtatën ditë me radhë çmimi i arit të zi vijon pikiatën duke iu afruar ndjeshëm nivelit më të ulët të 11 viteve të fundit.
Nafta bruto ra me 3.8 %, duke prekur kuotën e 36.5 dollarëve për fuçi.
Shkaku është oferta e lartë për shkak të prodhimit masiv nga vendet e OPEC. Ndërkohë kërkesa për naftë mbetet e ndrydhur ndikuar kjo edhe nga dobësia që po kalon ekonomia botërore.
Karteli i OPEC-ut, organizmi më i madh prodhues i naftës në botë, nuk e ka ulur prodhimin pavarësisht rënies së çmimeve, madje ka bërë të kundërtën duke e rritur atë si një taktikë për të nxjerrë nga tregu prodhuesit e tjerë, veçanërisht Shtetet e Bashkuara të Amerikës, që prodhon naftën argjilore.
Veç kësaj, oferta pritet të rritet sërish vitin tjetër për shkak të heqjes së sanksioneve ndaj Iranit, i cili mund të eksportojë në tregjet botërore një sasi shtesë prej 700 mijë fuçi nafte në ditë. Prodhuesit e Gjirit Persik dhe Rusia janë shprehur të vendosur për mos e ulur prodhimin edhe sikur çmimi të bjerë në 20 dollarë për fuçi.
Të premten, Agjencia Ndërkombëtare e Energjisë tha se teprica e ofertës do të thellohet vitin tjetër duke bërë edhe më shumë presion për rënie të mëtejshme në çmimin e naftës drejt minimumeve historike.
