Një takim mes prodhuesve të naftës, qofshin këta anëtarë të OPEC apo jo anëtarë, me synimin për të arritur një marrëveshje mbi ngrirjen e prodhimit të mëtejshëm u ndesh me pengesa të minutës së fundit në Katar, këtë të dielë, për shkak të një kërkese të re nga udhëheqësi “de facto” i OPEC-ut, Arabia Saudite.
Lajmi bëhet i ditur nga agjencia e lajmeve Reuters, që bën të ditur se ministrat përgjegjës për naftën janë mbledhur të gjithë përreth një tryeze të kryesuar nga emiri i Katarit, Sheiku Tamim bin Hamad al-Thani, i cili ka pasur një rol deciziv në promovimin e qëndrueshmërisë së prodhimit gjatë muajve të fundit, me synimin për të arritur një marrëveshje që do të forconte çmimin e naftës krudo, apo të papërpunuar.
“Ekziston një çështje dhe për këtë po diskutojnë ekspertët, sesi të gjejnë një zgjidhje të pranueshme. Kam besim se ata gjithsesi do të arrijnë ta gjejnë një zgjidhje”, tha një burim i Reuters.
Por, një tjetër burim ka bërë të ditur se Arabia Saudite ka dashur që në këtë takim të rëndësishëm të marrin pjesë të gjithë anëtarët e OPEC-ut, pavarësisht se më herët kishte këmbëngulur që Irani të përjashtohej, për shkak se Teherani nuk dëshiron të ngrijë prodhimin.
Arabia Saudite ka mbajtur një qëndrim të ashpër ndaj Iranit, i vetmi vend prodhues i OPEC-ut që ka refuzuar të marrë pjesë në përpjekjet për ngritje të prodhimit. Teherani thotë se, atyre vet u nevojitet të rifitojnë tregjet pas heqjes në janar të sanksioneve ndërkombëtare që rëndonin prej vitesh ndaj Republikës Islamike.
Pretendenti i dytë në radhë i kurorës, Mohammed bin Salman tha se Mbretëria arabe do të kufizojë prodhimin vetëm nëse të gjithë prodhuesit e mëdhenj, përfshi Iranin, do të binin dakord të ngrinin prodhimin.
