Qarkullimi i Omicron dhe detyrimi i “Green Pass” për administratën pas 4 Janarit, ka rritur numrin e të vaksinuarve në Shqipëri.
Mesatarisht çdo ditë janë kryer mbi 7 mijë vaksinime në vend, doza të para, të dyta apo edhe të treta.
“Jemi në një volum pune goxha të mëdha, ndoshta është edhe pjesa administrative që njerëzve ju duhet. Por ne na vjen mirë që njerëzit po vaksinohen gjithnjë e më shumë të vaksinohen. Po arrijmë në një numër vaksinimi goxha të lartë.
Vetëm në qendrën Nr.9, edhe pse është fundvit kryhen rreth 90 vaksinime në ditë. Kemi shumë vaksina doza të para. Kemi moshat e treta sepse kanë 6 muaj të dozave të treta, por ka edhe rritje tek grupmosha aktive”.
Ndryshe nga javë më parë, edhe numri i fëmijëve të vaksinuar ka pësuar rritje. Vetëm tek qendra shëndetësore Nr.9 janë 200 fëmijë të vaksinuar.
“Ka rritje edhe tek fëmijët 15-16 vjeç, janë rreth 200 të vaksinuar”.
Situata e Covidi në Shqipëri mbetet e qëndrueshme. Ajo që vihet re është rritja e testimeve për shkak të shenjave të ngjashme me Covid.
“Minimumi 30 teste në ditë po bëhen. Faktikisht javën e fundit kemi vënë re një rritje të situatave që shumica na kanë dalë virale, me temperaturë të lartë. Pavarësisht moshave ka patur pediatrike dhe ato të mëdha, por edhe pas testeve kemi pasur rritje dhe na figurojnë që shumica janë virale të stinës”.
Pjesa më e madhe e të infektuarve janë të pavaksinuar. Sipas mjekëve, ajo përqindje e vogël e të vaksinuarve që më pas janë infektuar me Covid, në shumicën e rasteve janë asimptomatik./m.j
