Vetëm përgjatë javës së fundit në të gjithë botën u regjistruan 15 milionë raste të reja pozitive me COVID-19.
Kreu i Organizatës Botërore të Shëndetësisë, Tedros Adhanom Ghebreyesus, tha një ditë më parë se “Omicron” ka një shkallë transmetueshmërie të lartë, por është më pak agresiv në raport më variantin “Delta”.
Në konferencën e mbajtur për mediat të enjten, kreu i OBSHsë tha se numri i vdekjeve javore kishte mbetur i qëndrueshëm qe prej tetorit të kaluar, me një mesatare prej 48 mijë humbje jetësh. Megjithatë, Ghebreyesus ngriti shqetësimin për shpërndarjen jo të barabartë të vaksinave. Në Afrikë tha ai më shumë se 85 për qind e qytetarëve janë të pavaksinuar. Një situatë e tillë mund të jetë vatër për variantet e reja të koronavirusit, të cilat mund të kthehen në kërcënim të vazhdueshëm për pjesën tjetër të globit e që mund të kushtëzojnë ecurinë e pandemisë. “Nuk duhet t’i hapim rrugën virusit apo të nxjerrim flamurin e bardhë, veçanërisht kur kaq shumë njerëz rreth botës mbeten të pavaksinuar. Në Afrikë më shumë se 85 për qind e qytetarëve nuk kanë marrë ende një dozë të vetme të vaksinës. Nuk mund t’i japim fund fazës akute të pandemisë nëse nuk e eliminojmë këtë hendek”, tha Tedros Adhanom Ghebreyesus, drejtori i OBSHsë. Kur është bërë më shumë se një vit nga nisja e procesit të vaksinimit të dhënat tregojnë se ka ende shumë punë të bërë deri në vaksinimin e 70 për qind të popullatës. Procesi ka avancuar në vendet e zhvilluar, por s’mund të thuhet e njëjta gjë për vendet e botës së tretë ku ritmet e vaksinimit vijojnë të jenë të ulëta.
PËRHAPJA E INFEKSIONIT
Për shkak të shifrave gjithnjë në rritje të infeksionit, Organizata Botërore e Shëndetësisë parashikon një situatë të zymtë lidhur me pandeminë e koronavirusit. Sipas këtij institucioni, me ritmet e deritanishme deri në mes të marsit mund të jetë infektuar më shumë se gjysma e europianëve nga varianti “Omicron”, duke u kthyer në variantin dominant. “’Omicron’ është si një stuhi, që po kalon nga Perëndimi në Lindje përmes rajonit europian dhe po i shtohet shifrave të rritura të variantit ‘Delta’”, tha drejtori rajonal i OBSH-së, Hans Kluge.
VARIANTI I RI
Disa ditë më parë autoritetet shëndetësore në Qipro kanë ngritur shqetësimin për një mutacion të ri që është një kombinim i simptomave të “Omicron” dhe “Delta”-s, duke e pagëzuar këtë version me emrin “Deltacron”. Mjekët tregohen të rezervuar sa i takon vlerësimeve mbi rrezikun nga ky variant i kombinuar, por ajo që mund të thuhet me siguri është se e ardhmja e covid-19 është ende në pikëpyetje.
g.kosovari
