Zbardhja e të vërtetës për rrethanat e vdekjes së Lirie Lamit në Kamëz një vit më parë ka tronditur mbarë opinionin publik. Nusja e shtëpisë Marjana Cmeta, 21-vjeçe është arrestuar një ditë më parë si autore e ngjarjes pasi ka helmuar me fostoksinë 48-vjeçaren.
Report Tv ka mbërritur në banesën e viktimës në Kamëz. Fqinjët e familjes Lami shprehen se ishin tronditur kur kishin mësuar se çfarë kishte ndodhur në të vërtetë.
Ata thonë se familja e viktimës kishte thënë se Lirie Lami humbi jetën nga infarkti, ndërsa kujtojnë se 48-vjeçarja ishte grua e mirë dhe nuk kishin dëgjuar për konflikte me nusen e djalit, Marjana Cmeta, 21 vjeçe.
“Ishte grua e mirë. U tha se vdiq nga infarkti në zemer, e morëm vesh vonë çfarë kishte ndodhur. Nuk kishim djeni për konflikte mes nuses dhe Liries. Ne e njihnim Lirien për grua shumë të mirë. Ngjarja na ka tronditur. Nusja priste fëmijë kur bëri vrasjen. Nuk e dinim që ishin zënë me parë, e dinim që shkonim mirë”, shprehen për mikrofonin e Report Tv fqinjët e Lirie Lamit, 48-vjeçares e cila u helmua nga nusja e djalit të saj, Olti Lami.
Kjo e fundit u arrestua një ditë më parë nga policia me akuzën e vrasjes, ndërsa në pranga kanë rënë edhe vjehrri i saj si dhe hoxha Hysen Shehu, për moskallëzim krimi. Ndërsa bashkëshorti i 21-vjeçares, djali i viktimës, Olti Lami, ka insistuar vazhdimisht për të vërtetën. Ai ka qenë personi i fundit që ka mësuar të vërtetën tronditëse. /a.m.
