Më shumë se 1,000 raste të dhunës seksuale janë regjistruar që nga fillimi i konfliktit në Ukrainë, njoftoi këtë të premte Komisioneri i Lartë i Kombeve të Bashkuara për të Drejtat e Njeriut, duke ia atribuar nëntë nga dhjetë incidente palës ruse.
“Jam thellësisht i shqetësuar nga frekuenca e këtyre akteve të shëmtuara dhe kam frikë se ato do të vazhdojnë në kontekstin e dhunës së pandërprerë që shohim çdo ditë në Ukrainë”, tha Komisioneri i Lartë Volker Turk në një deklaratë.
Sipas një raporti të ri, bazuar në intervista konfidenciale të kryera me qindra viktima të dhunës së kryer nga të dyja palët, si dhe dokumente gjyqësore dhe të dhëna zyrtare, “1,004 raste të dhunës seksuale u regjistruan nga 24 shkurti 2022, data e fillimit të ofensivës ruse në Ukrainë ”, deri në fund të korrikut.
Ky numër “përfaqëson vetëm një pjesë të realitetit”, u tha gazetarëve në Gjenevë Danielle Bell, kreu i misionit të monitorimit të të drejtave të njeriut të OKB-së në Ukrainë. Studiuesit arritën të flisnin me rreth 10 përqind të të burgosurve të liruar nga dy kampet dhe nuk u lejuan të hynin në territorin ukrainas të kontrolluar nga Rusia.
Nga të gjitha rastet e regjistruara, 89% i atribuohen palës ruse, kryesisht anëtarëve të Forcave të Armatosura, administratës së burgjeve dhe shërbimeve të sigurisë kombëtare, dhe 11% ukrainasve.
Këto abuzime “janë pjesë e një modeli tronditës torture, frikësimi dhe shtrëngimi që nga fillimi” i konfliktit, paralajmëron UNHCR-ja.
Shumica e viktimave të këtyre abuzimeve janë burra, kryesisht në qendrat e paraburgimit, por edhe gratë dhe fëmijët kanë qenë në shënjestër, kryesisht në territoret e pushtuara ukrainase.
“Aktet e dhunës së kryera përfshijnë përdhunim në grup, gjymtim gjenital, goditje elektrike dhe goditje në organet gjenitale, si dhe akte të tjera degraduese me natyrë seksuale”, theksoi UNHCR.
Mbijetuesja më e re e përdhunimit e regjistruar ishte një vajzë katërvjeçare dhe më e madhja, një grua 82-vjeçare. Në të dyja rastet, aktet u kryen nga autoritetet ruse, shtoi ai.
Të mbijetuarit raportuan se iu nënshtruan goditjeve elektrike në organet gjenitale. Pothuajse gjysma e abuzimeve që u atribuohen autoriteteve ukrainase kundër të burgosurve rusë të luftës ose shtetasve të vendeve të treta përfshijnë kërcënime për dhunë seksuale.
Pjesa tjetër përfshin raste në të cilat viktimat janë detyruar të zhvishen, kanë pësuar goditje elektrike dhe goditje në organet gjenitale, si dhe dy sulme seksuale dhe dy tentativa përdhunimi.
“Rusia dhe Ukraina duhet të hetojnë të gjitha akuzat e besueshme për dhunë seksuale shpejt, tërësisht dhe në mënyrë të paanshme, dhe të sigurojnë që ata që janë përgjegjës të sillen para drejtësisë”, theksoi Turk.
