Katër persona në Tiranë, të dënuar për drogë, vjedhje me armë dhe dhunë si dhe pjesë e grupit kriminal janë vënë në “shënjestrën” e Operacionit Forca e Ligjit, për shkak të dyshimeve për pasurinë e tyre.
Në kuadër të zbatimit të Ligjit Special për masat pasurore ndaj individëve të dënuar apo akuzuar për krim të organizuar apo krime të rënda, OFL i ka nisur kërkesat me shkrim për vetëdeklarimin e burimeve të pasurisë:
-Genci Xhixha, banues në Tiranë, i dënuar për veprat penale “Prodhimi dhe shitja e narkotikëve” e kryer në formën e grupit të strukturuar kriminal dhe “Grupi i strukturuar kriminal”. Genci Xhixha është ndër të pandehurit e grupit të kokainës të laboratorit të zbuluar në Xibrakë, ku gjatë operacionit të policisë u arrestua edhe nipi i ish-diktatorit Enver Hoxha, Ermal Hoxha dhe njihej si mik i tij.
-Altin Çela, banues në Tiranë, i dënuar për veprat penale “Prodhimi dhe shitja e narkotikëve” dhe “Armëmbajtja pa leje”;
-Ergest Zhupani, banues në Tiranë, i dënuar për veprën penale “Vjedhja me armë”;
-Sulejman Sina, banues në Tiranë, i dënuar për veprën penale “Vjedhja me dhunë”.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së dhe më pas, përgjigjet e marra do t’i dërgohen SPAK-ut, për veprime të mëtejshme.
/a.r
