Ish-kryeministrit britanik, David Cameron ka marrë një “ofertë” marramendëse për punë por edhe paksa të “çmendur”. Oferta vjen nga vendi i pasur me energji, Kazakistani, konkretisht nga Unioni Mysliman dhe Komiteti i Azisë Qendrore për të drejtat e myslimanëve, të cilët i kanë premtuar një pagë prej 47 mln dollarësh ose 36 mln paund në vit.
Ata premtojnë se ish-kryeministri do të mbajë titullin “Sulltan” në postin e tij të ri, por për t’u kualifikuar si i tillë, duhet të bëhet synet.
“Ne e konsiderojmë përvojën tuaj të gjerë politike një aset që do të përdoret për të mirën e paqes afatgjate dhe të qëndrueshme në Azinë Qendrore”, thuhet në deklaratën e Unionit, i cili ka vënë në dukje edhe “suksesin” Tony Blair si një konsulent i shumë-paguar i liderit autoritar Nursultan Nazarbajev.
“Një bashkëpunim i tillë do të ndihmojë në forcimin e marrëdhënieve ekonomike dhe politike mes dy vendeve tona”, thuhet më tej në deklaratë, citojnë më tej mediat britanike.
Sipas Daily Mail që citon agjencinë TengriNews, “oferta për të punuar si këshilltar i presidentit të Unionit, Murat Telibekov është dërguar në zyrën e David Cameron”.
Telibekov shpesh përdor humorin për të tallur elitën në pushtet në Kazakistan, ku shumica e formave të protestave janë të ndaluara. Ai ka bërë edhe propozime të tjera të çuditshme. Vitin e kaluar ai propozoi një taksë mbi seksin. Një propozim tjetër është për të ekzekutuar presidentët, kur ata arrijnë moshën 80-vjeçare.
Propozimi i tij i fundit me sa duket është një formë ironie që vjen pas telegramit që presidenti i Kazakistanit i dërgoi zotit Cameron kur dha dorëheqjen nga posti i kryeministrit të Britanisë, ku shprehte mirënjohjen për liderin laburist. Diktatori gjithashtu e ka ftuar ish-kryeministrin në Kazakistan vitin e ardhshëm, për të marrë pjesë në EXPO 2017, ndoshta fillimi i një përpjekjeje për ta bindur atë për një takim fitimprurës si ai me Blair./bw/a.k
