Në emisionin e sotëm të “Tonight Ilva Tare” ishte i ftuar deputeti i Partisë Demokratike, Oerd Bylybashi, si dhe dy gazetarë të tjerë për të diskutuar për reformën në drejtësi. Deputeti demokrat shpjegoi edhe arsyen se pse nuk ka një përgjigje pozitive për t’u ulur në dialog me kryeministrin e vendit Edi Rama.
Bylykbashi: Për fat të keq, ai e vrau letrën e tij me një fjalë. E ka shkruar në letër. Zt. Rama mund të shkruaj një letër tjetër dhe ta korrigjoj gabimin. Po ta lexoni letrën e Ramës është e përgjithshme dhe jo e specifikuar. Rama thotë një gjë shumë të thjeshtë; hajdeni të mos biem dakord.
Komisioni i Venecias dhe ODIHR në asnjë rast nuk do të lejonin rënien në standard të propozimeve të Partisë Socialiste. Kësaj radhe nuk është kështu. Nuk i lihet asnjë hapësirë propozimi opozitës dhe sigurisht një qasje e tillë siç është reforma në drejtësi dhe eventualisht mund të përsëritet edhe tek reforma zgjedhore, nuk na çon askund tjetër përveç se mos dakordësinë, atë që kërkon z.Rama.
Deputeti demokrat zbuloi edhe një dobësi sipas tij të kryeministrit.
Bylykbashi: Po humbasin kohë kot. Edi Rama kur është i fuqishëm nuk bën marrëveshje. Kur është i dobët bën marrëveshje. Ka një problem të madh; ka një recidivizëm të frikshëm në thyerjen e marrëveshjeve.
Tare: Ka një hipotezë sipas të cilët, Partia Demokratike nuk donte t’i jepte kartën e dialogut kryeministrit Rama përpara vizitës së tij në Shtëpinë e Bardhë.
Bylykbashi: Kemi një ftesë të Ramës, i cili ka një përpjekje, dhe përpjekja e tij është; a mund ta vë Partinë Demokratike gjithmonë e më në një qoshe në mënyrë që opinioni publik ta gjykojë se ajo po bllokon. Dhe nëse e çoj vendin në zgjedhje të parakohshme, unë të fitoj!
Deputeti i opozitës tha se Reforma në Drejtësi duhet të miratohet sa më shpejtë në mënyrë që të ngrihet edhe Byroja e Hetimit, duke shtuar se kjo reformë është nevojë therëse.
Bylybashi: Unë dua të shoh sa më shpejt që Byroja Kombëtare e Hetimit dhe prokuroria antikorrupsion të çojë ministra të kësaj qeverie në burg për tendera të drejtpërdrejtë dhe korrupsion.
