Shpërndarja e vaksinave COVID-19 në Europë vazhdon të jetë e ngadaltë ndërsa numri i rasteve të reja në të gjithë rajonin ka shënuar rritje për të gjashtën javë radhazi, sipas një paralajmërimi nga OBSH.
Europa regjistroi 1.6 milion të infektuar javën e kaluar- rritja e gjashtë javore me radhë.
“Vetëm pesë javë më parë, numri javor i rasteve të reja në Europë ishte nën një milion, por tani situata në rajon është më shqetësuese,” theksoi Dorit Nitzan, Drejtori Rajonal i Emergjencave në Europë në një deklaratë.
Rritja e rasteve ishte në çdo grupmoshë, përveç te personat mbi 80 vjeç ose më shumë, të cilat OBSH tha se pasqyron “shenjat e hershme të ndikimit të vaksinimit”.
Të dhënat nga Britania e Madhe tregojnë se vaksinimi ka shpëtuar mbi 6,000 njerëz mbi 70 vjeç që kur vendi filloi fushatën e vaksinimit në fillim të dhjetorit.
“Vaksinat janë mënyra më e mirë për të dalë nga kjo pandemi. Jo vetëm që funksionojnë, ato janë gjithashtu shumë efektive në parandalimin e përhapjes së infeksionit. Sidoqoftë, përhapja e këtyre vaksinave është e ngadaltë ,” tha shefi i OBSH-së në Europë, Hans Kluge .
Deri më sot, vetëm 10 përqind e popullsisë së përgjithshme të rajonit kanë marrë të paktën një dozë të vaksinës dhe vetëm 4% janë imunizuar plotësisht.
Vaksinimi ka filluar në çdo vend me të ardhura të larta në rajon, por vetëm në 60 përqind të vendeve me të ardhura të ulëta, theksoi OBSH.
Dhjetë vende me të ardhura të mesme kanë marrë doza përmes mekanizmit COVAX – një program për ndarjen vaksinave i udhëhequr nga OBSH dhe prej të cilave Bashkimi Europian është kontribuesi i dytë më i madh, raporton abcnews.al
Gati 578 milion doza të vaksinave janë administruar në të gjithë botën dhe rreth 250 milion prej tyre janë administruar në SHBA, MB dhe BE / EEA. OBSH gjithashtu u bëri thirrje vendeve të zbatojnë masat sociale për të mbrojtur popullatat që nuk janë vaksinuar ende dhe për të zvogëluar ngarkesën në sistemet e kujdesit shëndetësor.
Më shumë se gjysma e 51 vendeve Europë janë në bllokim të pjesshëm ose të plotë. Franca do të hyjë në bllokimin e tretë kombëtar të shtunën pasi numri i pacientëve me COVID-19 në kujdes intensiv u rrit mbi 5,000 për herë të parë në 11 muaj./ b.h
