Deri në fund të mandatit 100 mijë leje legalizimi. Kjo është “detyra e shtëpisë” që Kryeministri Rama i ka lënë ALUIZNI-t deri në qershor të 2017-s. Kjo porosi e nënzëshme dje, sot ka marrë trajtat e një objektivi që kërkohet të përmbushet.
“Synimi mbetet që deri në mesin e vitit 2017, numri i objekteve të legalizuara të jetë 100 mijë, duke mbajtur premtimin për legalizimin e zonave masive informale brenda këtij mandati qeverisë”, është komunikuar zyrtarisht nga Ministria e Zhvillimit Urban. Por ky mision, sa i vështirë, aq edhe i pamundur duket në kushtet kur deri më tani janë legalizuar vetëm gjysma, pra 50 mijë ndërtime pa leje. Në harkun e një viti që ka mbetur, kjo shifër pretendohet që të dyfishohet.
VENDIMET
Për të bërë të mundur përshpejtimin e procesit, së fundmi janë miratuar edhe disa ndryshime të tjera ligjore që sheshojnë barrierat e mbetura. Përcaktimi i afateve konkrete e vendos ALUIZNI- n përballë përgjegjësisë, duke shmangur në këtë mënyrë çdo alibi të mundshme që mund të krijohet për vonesat.
Agjencia e Legalizimeve ka detyrimin për regjistrimin e objektit dhe pronës. Ky aplikim do të kryhet elektronikisht përmes një formulari me të dhënat bazë të familjes, si edhe dokumentacionin përkatës. Brenda 10 ditëve nga depozitimi i kërkesës, Hipoteka përmbyll procedurat e regjistrimit. Qytetarët do të njoftohen vetëm kur tapia të jetë gati për t’u tërhequr.
GJERMENI
Nga ana tjetër, edhe miratimi i planit të përgjithshëm vendor do të sjellë zhbllokim të procesit për ndërtime, që deri dje penalizoheshin. Nga Vora, ku u ndanë 300 leje legalizimi, ministrja Eglantina Gjermeni tha se me miratimin e planeve urbanistike do të rritet ndjeshëm edhe numri i objekteve të legalizuara.
“Me përfundimin dhe miratimin e planit të përgjithshëm vendor, hartimi i të cilit po financohet nga qeveria, ritmi i legalizimeve do të jetë më i shpejtë. Legalizimi i ndërtimeve informale është hapi i parë që i çel rrugën procesit të integrimit dhe kohezionit social të komunitetit”. Të pranishëm në aktivitet ishin edhe kreu i ALUIZNI- t, Artan Lame, dhe prefekti i qarkut Tiranë, Sadi Vorpsi./Panorama/a.m.
