“Barack Obama viziton Gjermaninë për herë të pestë dhe me shumë mundësi të fundit si President i SHBA. Mikpritja e Kancelares Merkel ishte e përzemërt, megjithatë në agjendë ngelen tema të vështira për t’u biseduar,” shkruan ‘Der Spiegel’ në artikullin e së Dielës, datë 24.04.2016.
Në një situatë reshjesh të dendura avioni “Air Force One” preku të Dielën aeroportin “Hannover-Langenhagen”. Barak Obama e ka nisur vizitën e tij e pestë në Gjermani, dhe ndoshta të fundit në cilësinë e Presidentit të SHBA, në kushtet e pafavorshme të motit të muajit Prill. Ceremonia, gjatë së cilës Kancelarja Gjermane, Angela Merkel e CDU, priti Obamën në Pallatin Herrenhausen në Hanover me nderime ushtarake, u zhvillua në mot të kthjellët. Pas përshëndetjes së përzemërt të dy ata dëgjuan para kopshtit me sfond barok himnet kombëtare të dy vendeve dhe parakaluan përgjatë Gardës së Nderit të Forcave të Armatosura të Gjermanisë.
Pas një bisede kokë më kokë Merkel dhe Obama hapen Panairin e Hanoverit në orën 18.00. SHBA-të janë këtë vit pritësit e panairit industrial më të madh të botës. Pritet që Obama ta përdorë vizitën e tij në Gjermani, për të përmbyllur marrëveshjen e diskutueshme të tregtisë së lirë TTIP (Partneriteti Transatlantik i Tregtisë dhe Investimeve) mes vendit të tij dhe BE.
Por ka gjasa të diskutohet edhe mbi krizat në Siri dhe Libi dhe kërcënimin lidhur me terrorizmin. Të Dielën në mbrëmje Merkel dhe Obama do të takohen për një darkë pune me përfaqësues të biznesit të dy vendeve.
Vizite pa Michelle
Të hënën në mëngjes, Kancelarja Gjermane dhe Presidenti Obama kanë planifikuar një vizitë të përbashkët në Panairin e Hanoverit, ku Obama do të mbajë një fjalim. Para nisjes së tij Merkel dhe Obama do të takohen të hënën pasdite së bashku me Kryeministrin Britanik, David Cameron, Presidentin Francez, François Hollande, dhe Kryeministrin Italian, Matteo Renzi, për të diskutuar mbi çështjet botërore.
Michelle Obama nuk ka ardhur në Gjermani. Zonja e Parë tashmë është kthyer sërish në SHBA. Ajo kishte shoqëruar presidentin në Londër, ku çifti kishte takuar ndër të tjera Mbretëreshën pothuajse 90 vjeçare të Anglisë dhe Princin e vogël George.
Para se presidenti amerikan të vizitonte Gjermaninë, Michelle la delegacionin, pasi kishte një takim në SHBA: Të shtunën në mbrëmje ajo mbajti një fjalim para të diplomuarve të Jackson State University në Shtetin e Misisipit.
Përgatiti Horald Kulli
