“O buburrec, kur do përballemi?”, Meta sulmon Ramën: Tre milionë Ilirë janë gati ta rrëzojnë Esatin e Rilindjes

“Unë kam zgjedhur të vë trëndafilin e socialistëve të 25 prillit në maskë. Iliir mund të vërë Vojo Kushin. Maska prodhohet vetë, është një mbrojtëse tekstili”.

Kësaj deklarate të Edi Ramës i është përgjigjur sot Ilir Meta, i cili ka vijuar të pozicionohet si ‘avokat’ i LANÇ dhe dëshmorëve.

Ai shprehet se më 25 Prill, tre milionë Ilirë do ta rrëzojnë ‘Esatin e Rilindjes’.

Postimi i plotë i Metës:

Esati i Rilindjes, zëdhënësi i armiqve të Kombit Shqiptar, guxoi sërish sot të marrë nëpër gojë Vojo Kushin, duke ofenduar për të disatën herë Dëshmorët e Atdheut, familjarët e tyre, veteranët dhe të gjithë shqiptarët që nderojnë dhe krenohen me vlerat e Luftës Antifashiste Nacionalçlirimtare.

Esati i Rilindjes, pengu i armiqve më të egër të Kombit Shqiptar, që ka nxjerrë në shitje Shqipërinë dhe Kosovën provoi para të gjithë shqiptarëve për të disatën herë se i urren Dëshmorët dhe Heronjtë e Atdheut, si Vojo Kushi, që kanë sakrifikuar gjithçka, duke falur edhe jetën e tyre, për Atdheun!

Esati i Rilindjes, armiku më i egër i socialistëve idealistë, guxoi sot të fyejë edhe simbolin e tyre dhe të Partisë Socialiste, trëndafilin e kuq si gjaku, që prej kohësh e ka zëvendësuar me gjethen e kanabisit dhe barin e egër të Rilindjes, që rritet në llumin e oligarkisë dhe bandave.

Esati i Rilindjes duhet ta ketë të qartë se numërimi mbrapsht për të dhe Sektin pa nder, pa vlera e pa Atdhe që përfaqëson, ka filluar dhe NUK DO NDALET!

TRE MILIONË ILIRË NË 25 PRILL I KA GATI!

Dhe nuk më thua, o trendi buburrec, kur do dalësh në përballje me mua?
Mezi po të pres!

/a.r