Dështon seanca ndaj imamëve të vetëshpallur të akuzuar për rekrutimin e luftëtarëve për t’iu bashkuar ISIS-it në Siri dhe Irak. Këtë të martë, të pandehurit Gerti Pashja dhe Fadil Muslimani i kërkuan trupit gjykues të zbusë masën e sigurisë ndaj tyre, por gjykata e rrëzoi këtë kërkesë duke i lënë në “arrest me burg”.
Por gjatë kohës që trupi gjykues ishte tërhequr për vendim, Fadil Mulsimani, i njohur për bejtet që bën gjatë qëndrimit në paraburgim, ka lëshuar një tjetër deklaratë që këtë radhë shigjeton deputetin e Partisë Socialiste Ben Blushin.
“O Allah, dënoje Ben Blushin që tallet me myslimanet tek romani i tij”. Në romanin “Të jetosh në ishull” Blushi prek tema fetare që mesa duket nuk i kanë lënë shije të mirë imamët të vetëshpallur i cili kohën në paraburgim e ka shfrytëzuar edhe për të lexuar libra. Blushi ka deklaruar hapur se është ateist dhe nuk beson në Zot.
Në seancën e shkuar Fadil Muslimani i dedikoi një poezi kryetarit të demokratëve Lulzim Basha.
Ashtu si edhe në seanca të tjera, të pandehurit kanë deklaruar se nuk e njohin këtë turp gjykues. Disa prej tyre përfaqësohen me avokatë, por të tjerë e refuzojnë pasi sipas imamëve të vetëshpallur ata mund t’i gjykojë vetëm Allahu.
Pas debateve me trupin gjykues imamët braktisën sallën duke bërë që edhe kjo seancë e radhës ndaj tyre të dështojë.
Gjyqi që zhvillohet ndaj tyre në Gjykatën e Krimeve të Rënda në Tiranë mund të konsiderohet pa frikë ndër më problematikët, për shkak të tensioneve të vazhdueshme të krijuara në sallë.
