Përdorimi i raketës së re hipersonike nga Rusia në Ukrainë javën e kaluar rriti frikën për një përshkallëzim të armiqësive.
Sipas mediave të huaja, gjuajtja e raketës Oreshnik u prezantua nga Vladimir Putin si një përgjigje e drejtpërdrejtë ndaj SHBA-së dhe Britanisë së Madhe, që lejuan përdorimin nga Ukraina të raketave që ata kanë furnizuar për të goditur objektivat thellë brenda Rusisë.
Megjithatë, një raport nga New York Times sugjeron se që atëherë mund të ketë pasur përpjekje shumë të pazakonta për të shmangur çdo rritje të tensioneve midis Moskës dhe Perëndimit.
Sipas zyrtarëve të mbrojtjes dhe ushtarakëve të cituar nga gazeta, gjenerali rus Valery Gerasimov telefonoi këshilltarin më të lartë ushtarak të Joe Biden javën e kaluar dhe foli për mënyrën e menaxhimit të shqetësimeve të përshkallëzimit midis dy vendeve.
Në kundërshtim me pretendimet e Putinit, raporti tha se Gerasimov i tha gjeneralit Charles Brown, kryetarit të Shtabit të Përbashkët, se lëshimi i raketës balistike Oreshnik ishte planifikuar shumë kohë përpara se Uashingtoni të pranonte të lejonte Ukrainën të përdorte ATACMS amerikane për të goditur më thellë në Rusi.
Kapiteni Jereal Dorsey, një zëdhënës i gjeneralit Brown, tha në një deklaratë pasi u pyet në lidhje me thirrjen se “me kërkesë të gjeneralit Gerasimov, gjenerali Brown ra dakord të mos shpallte në mënyrë proaktive thirrjen”.
Ai shtoi se të dy burrat “diskutuan një numër çështjesh të sigurisë globale dhe rajonale, duke përfshirë konfliktin e vazhdueshëm në Ukrainë”.
Lajmi nxiti kuriozitet mes analistëve, të cilët sugjeruan se mund të ketë një rëndësi të veçantë, shkruan A2 CNN.
Pavel Podvig, një ekspert në forcat bërthamore ruse dhe studiues i lartë në Institutin e OKB-së për Kërkimin e Çarmatimit, tha: “Kjo është shumë interesante. Thirrje për të de-përshkallëzuar?”
Instituti për Studimin e Luftës, ndërkohë, vuri në dukje se rrëfimi i telefonatës tregonte se pretendimet e gjeneralit rus ishin në kundërshtim me narrativën e shtyrë nga presidenti rus, shkruan A2 CNN.
“Deklarata e Gerasimov drejtuar Brown, nëse është e saktë, e minoi drejtpërdrejt këtë operacion informacioni në vazhdim duke pranuar se lëshimi i Oreshnik-ut nuk ishte i lidhur me sulmet ukrainase në Rusi me armë të ofruara nga perëndimi, siç pretendoi në mënyrë eksplicite Putin në një adresë urgjence menjëherë pas sulmit,” thanë analistët.
/a.r
