Nga Mero Baze
Një ministre e kabinetit “Rama” është thirrur në një seancë dëgjimore në Komisionin e Shëndetësisë për ta dëgjuar, siç u tha në mbledhjen e parë të Komisionit, se si është ndërtuar struktura e re e Ministrisë, pas riorganizimit të bërë nga qeveria. E vërteta është se riformatimi i ministrive prej kryeministrit Rama, ka sjellë shumë andralla administrative dhe paqartësi, në disa raste dhe vetë zyrtarëve, se si do të rigrupohen. Në këtë pikë është e logjikshme që deputetët e Komisionit të jenë të qartë se çfarë duhet të bëjnë.
Por kërkesa për dëgjesë në Komision duke thirrur ministren e Shëndetësisë, është teprim. Një ministre që ende nuk ka filluar punën dhe akoma nuk ka caktuar njerëzit nëpër zyra, mund të shkojë dhe të referojë në Komision, por është opozitarizëm i sforcuar i atyre që e kërkojnë.
Për t’u informuar rreth strukturës së re të qeverisë apo të çdo Ministrie, mund t’i dërgosh një shkresë ministres dhe ajo të sjellë një përgjigje të detajuar, duke të dorëzuar organigramën dhe gjithë sferat qeverisëse të dikasterit të saj.
Pas kësaj, mund të shikosh se si do ecë puna dhe si do të funksionojë Ministria, për të operuar si opozitarë.
E njëjta frymë duket dhe në mbledhjen e grupit parlamentar të PD, ku nga kompleksi për të mos u dukur opozitë e dobët dhe e fjetur, fjalitë e vetme që citohen për shtypin, janë interpelancat, dëgjesat etj.
Merreni më qetë! Akoma nuk ka filluar qeverisja dhe do të keni kohë për të gjitha. Sidomos për interpelanca dhe debate parlamentare.
Por i gjithë ky nxitim, dhe sidomos debatet e Gridës dhe doktor Halimit në Komision, të tregojnë qartë se sa të paqartë janë vetë opozitarët se çfarë duhet të bëjnë e si duhet ta bëjnë.
E vërteta është se opozita ka një krizë të fortë brenda saj, një debat të nxehtë politik, një gërryerje dhe mungesë besimi të anëtarësisë së saj, për ekipin e imponuar drejtues, dhe po bën përpjekje të tregojë muskujt, që të duket e fortë, me shpresë se do eklipsojë problemet e brendshme. Këto skenat e sotme së paku janë tërësisht artificiale dhe ngjajnë më shumë si poza të sforcuara missesh, se sa si opozitë. Sidomos kur flet me sy nga qeveria dhe veshët i ke nga armiqtë brenda partisë.
a.ç
