Nxënësit, mësim me dy turne, Malaj: Zgjedhjet penguan rikonstruksionin e shkollave
Mbipopullimi i klasave dhe mungesa e infrastrukturës shkollore në shumicën e qyteteve të mëdha, ka bërë që Ministria e Arsimit të marrë vendimin për të zhvilluar mësim me dy turne. Në fakt punimet dhe rikonstruksioni i shkollave ka nisur që herët, por për shkak të fushatës dhe zgjedhjeve të 21 qershorit, procesi nuk mundi të përfundonte në kohë.
“Problematika do të kemi në rrethet e mëdha, pasi ende nuk kanë përfunduar shkollat, që fatkeqësisht janë një pjesë në rikonstruksion, për arsye se punimet kanë filluar me vonesë edhe prej fushatës dhe zgjedhjeve të pushtetit lokal. Firmat duket se kanë punuar më ngadalë, por do të doja shumë të gjeja mirëkuptimin e tyre dhe t’u bëja thirrje edhe kryetarëve të Bashkive, të marrin përsipër – në partneritet të fortë me Ministrinë e Arsimit – vendimmarrjet për të përshpejtuar punimet e firmave që janë duke punuar. Të ndihmojnë për kushtet e emergjencës”, u shpreh zëvendësministrja e Arsimit, Nora Malaj.
Tri ditë para fillimit të vitit të ri shkollor, në arsimin bazë janë regjistruar 306 mijë nxënës. Për herë të parë, Ministria e Arsimit dhe Sportit po ofron mundësinë që nxënësit, të cilët kanë përfunduar arsimin bazë, të mund të vijojnë gjimnazin “part-time”, si në arsimin profesional edhe në atë publik, ku deri më tani janë regjistruar 256 nxënës.
