Një nxënës i shkollës “Hysen Malko” në fshatin Kryekuq të Divjakës, ku mësuesi Demir Hoxha abuzonte seksualisht me shoqen e tij të klasës 12-vjeçaren A.K, ka flour për ngjarjen.
11-vjeçari M.K ka treguar më shumë rreth mësuesit kujdestar si dhe marrëdhënies që ai kishte më të miturën.
“Dikur mua më pëlqente shumë si mësues, sepse ishte shumë i dashur, na ndihmonte me detyrat dhe na plotësonte ndonjë tekë gjatë orës së mësimit, por tani nuk më pëlqen më. Veprimi që bëri ai me shoqen tonë është shumë i keq”, tregon ai.
11-vjeçari thotë se sjelljen e dyshimtë mes mësuesit dhe nxënëses A.K ata e kishin vënë re që muaj më parë dhe ua kishin treguar këto dyshime edhe prindërve, por askush nuk i kishte marrë seriozisht.
“Ne kemi dëshirë të dalim dhe të luajmë jashtë në oborr dhe gjatë këtij viti mësuesi na i plotësonte dëshirën çdo ditë, duke na lënë të lirë të dilnim, me pretekstin se do të zhvillonim fizkulturë. Ne dilnim, ndërsa A. nuk dilte asnjëherë. Atë e mbante mësuesi në klasë, me pretekstin se do ta ndihmonte për të parë detyrat apo testimet ose për të plotësuar regjistrin. Dyshimet tona u rritën, kur vumë re se perdet e klasës mbylleshin, kur mësuesi ishte vetëm me A. në klasë. Një herë, kur disa të rritur na i morën topin, ne tentuam që të lajmëronim mësuesin, por nuk mundëm, pasi ai derën e kishte mbyllur me çelës dhe nuk e hapte, edhe pse ne trokitëm për shumë minuta”, thotë 11-vjeçari.
Ai tregon se ky nuk ishte rasti i vetëm. Në pozicione të papërshtatshme mësuesin e kanë parë edhe nxënës të tjerë nga klasa.
Madje një vajzë guxoi dhe e shkroi diçka të tillë edhe në dërrasën e zezë, mirëpo asgjë nuk ndryshoi. “Atë ditë nuk kemi bërë fare mësim, vetëm kemi folur për këtë ngjarje. Madje dy vajza qanë, sepse menduan se ishin ato në atë vizatim”, tregoi 11-vjeçari. Sipas tij, A.K mbahej shumë me hatër nga mësuesi. Ajo kontrollonte detyrat, madje plotësonte edhe regjistrin. “Ishte shumë e lirshme në klasë dhe ulej shpesh te tavolina e mësuesit dhe ai nuk i thoshte gjë. Thashethemet për marrëdhënien mes mësuesit dhe A. në klasën tonë kanë nisur që kur ishim në klasën e tretë, pasi një shok pretendonte se i kishte parë bashkë, duke bërë veprime të pahijshme. Por, ato u thelluan më shumë në fund të klasës së pestë, kur mësuesi kalonte shumë kohë i mbyllur në klasë me A. duke mbyllur perdet dhe derën me çelës, sa herë ne largoheshim”, tregon M./ Marrë nga Shekulli
