Pedro Sanchez mund të ndalojë për një çast dhe të kujtojë me nostalgji vjeshtën e vitit 2018. Vetëm gjashtë muaj pasi mori drejtimin e qeverisë, Kryeministri socialist i Spanjës ironizonte kundërshtarët e tij që e përshkruanin si një rrezik për vendin.
“Unë e di që mendoni se jam një ekstremist i rrezikshëm i së majtës që po përpiqet të shpërbëjë Spanjën“, tha ai në senat në tetor të atij viti. “E di që gjithçka që bëj unë dhe qeveria ime është e paligjshme, imorale, madje edhe e dëmshme për shëndetin.”
Por gati shtatë vite më vonë, këto fjalë kanë marrë një kuptim tjetër. Si i vetmi lider i qendrës së majtë që ka mbetur në Bashkimin Europian, Sanchez po përballet me sfidën më të madhe të karrierës së tij politike. Ngjarjet e fundit kanë tronditur reputacionin e qeverisë së tij dhe të vetë figurës së tij si luftëtar i deklaruar kundër korrupsionit.
Në qershor të vitit 2018, Sanchez hyri në historinë politike të Spanjës si i pari udhëheqës opozitar që arriti të rrëzojë një qeveri përmes një mocioni mosbesimi. Partia Popullore (PP) konservatore, që kishte shtatë vjet në pushtet, ishte thellësisht e përfshirë në skandale korrupsioni dhe sapo ishte goditur rëndë nga një vendim gjykate që zbulonte një skemë të paligjshme pagesash nën dorë për kontrata publike.
Por sot, rolet janë përmbysur. Vetë rrethi i afërt i Sanchez është përfshirë në një rrjet akuzash, skandale të ndërlikuara, zëra përgjimesh dhe dyshime për ndërhyrje politike.
Vetëm javën e kaluar, krahu i djathtë i Sanchez -it, Santos Cerdan sekretari organizativ i Partisë Socialiste, dha dorëheqjen pasi një gjykatës i Gjykatës së Lartë konstatoi prova të forta për përfshirjen e tij në marrje ryshfeti për kontrata ndërtimi publike.
Cerdan është i lidhur me rastin e ish-ministrit të Transportit, Jose Luis Abalos, dhe ish-këshilltarit të tij, Koldo Garcia. Abalos u shkarkua në vitin 2021 dhe u pezullua nga PSOE vitin e kaluar, pasi refuzoi të dorëhiqej kur Garcaa u akuzua për marrje ryshfeti në kontratat e maskave gjatë pandemisë. Të dy kanë mohuar çdo përfshirje.
Në ditët e fundit janë publikuar materiale të përgjuara ku Cerdan dëgjohet duke diskutuar për ryshfete me Abalos dhe Garcia, si dhe duke i kërkuar Garcias të ndikonte në votimin e brendshëm të vitit 2014, kur Sanchez u zgjodh drejtues i partisë. Janë shfaqur edhe audio të diskutimeve vulgare mes Abalos dhe Garcia për punonjëset e seksit.
Në këtë kontekst, nuk ishte çudi që Sanchez deklaroi të enjten e kaluar: “Nuk duhej ta kisha besuar kurrë Cerdanin. Kam shumë të meta, por gjithmonë kam besuar në politikën e ndershme dhe lojën e pastër”.
Por skandalet nuk ndalen këtu. Nën hetim janë edhe bashkëshortja e kryeministrit, Begona Gomez, dhe vëllai i tij, David Sanchez.
Pyetja që lind në këtë situatë, është nëse Pedro Sanchez do të arrijë të mbijetojë deri në zgjedhjet e ardhshme të përgjithshme të vitit 2027?
