Nuk ushtruan kontroll për dasmën, por ia morën valles me nusen… Pezullohen katër policët, gjobë lokalit (VIDEO)

Video e shpërndarë në internet, ku disa policë kërcejnë në një dasmë, u ka kushtuar vendin e punës këtyre të fundit.

Burime nga Policia thonë se katër efektivët janë pezulluar pasi nuk kanë ushtruar kontroll për masat anti-Covid në ceremoninë në fjalë.

Nga ana tjetër edhe pronari i lokalit në Malësinë e Madhe është gjobitur me 10 milionë lekë të vjetra.

Në pamjet e mëposhtme, katër efektivët shfaqen me uniforma dhe të armatosur teksa kërcejnë. Mendohet se ata kanë ndërhyrë në dasmë për të ushtruar kontroll, por më pas janë joshur nga atmosfera duke u bërë pjesë e saj.

Nga verifikimet e kryera nga grupi i kontrollit në bashkëpunim me Drejtorinë Vendore të Policisë Shkodër, u evidentua lokali ku ishte zhvilluar dasma dhe u ndëshkua me 1.000.000 lekë gjobë, për organizim dasme në kundërshtim e Aktin Normativ, pronari i lokalit shtetasi E. R, banues në Malësinë e Madhe.

Nga verifikimet e kryera rezultoi se punonjësit e policisë që mbulojnë zonën policore Specialisti i Policisë Kriminale shtetasi J. R., Inspektori i policisë së zonës N. R., dhe dy punonjës të Patrullës së Përgjithshme S. K., dhe A. M.) nuk kishin ushtruar kontroll për zbatimin e masave për parandalimin e përhapjes së COVID-19 dhe për këtë shkelje të rëndë me urdhër të Drejtorit të Përgjithshëm të Policisë së Shtetit janë pezulluar nga detyra.

Gjithashtu po me urdhër të Drejtorit të Përgjithshëm të Policisë së Shtetit, pas inspektimit të bërë nga grupi i kontrollit i ngritur për këtë qëllim, Drejtoria e Standarteve Profesionale ka filluar ecurinë disiplinore për shkelje të rëndë për Shefin e Komisariatit të Malësisë së Madhe L. N; Shefin e Rendit S.K; dhe Shefin e Hetimit të Krimit K.C.