Kryeministri Edi Rama tha sot në konferencën e fundvitit se Shqipëria sot është në nivel tjetër sa i takon luftën kundër krimit të organizuar.
“Falë edhe bashkëpunimit me Prokurorinë e Posacme dhe punës intensive të bërë sot jemi në nivel krejt tjetër, sot flas për fakte e shifra, jo për perceptime në raport me forcën që ka fituar shteti dhe terrenin që ka humbur krimi i organizuar. Jemi në nivel krejt tjetër edhe për luftën kundër trafiqeve dhe drogës.”
Ai kishte edhe një sugjerim jo si kreu i qeverisë, por si bashkëqytetar i vendit.
“Më lejoni një sugjerim jo si kryeministër… Për ju si bashkëqytetar i këtij vendi, mos ia bëni Shqipërisë atë që të tjerë ja bëjnë me kollajllëkun më të madh duke e pikturuar si vend krimi e droge, se nuk është! Nëse do të ishte nuk do të ishte duke negociuar me BE-në, nëse do të ishte nuk do kisha unë në tryezë planin për të mbaruar negociatat në fund të vitit 2027. Thjesht nuk do ndodhte! Nëse sot prokurorët special të Shqipërisë thirren, kërkohen në vendet e Europës e Amerikës Latine, thirren si aleatë të besueshëm, jo si turistë”, tha Rama.
