Rey Manaj nuk do të jetë pjesë e Peskarës në pjesën e dytë të këtij sezoni në Serinë A. Lajmi jepet nga e përditshmja sportive italiane, “La Gazzetta Dello Sport”, e cila ka parashikuar që futbollisti të largohet që në ditët e para të vitit 2017 nga ekipi i tij aktual.
Peskara e huazoi nga Interi me shpresën që ai të kthehej në sulmuesin që do të garantonte vazhdimësi dhe gola. Por vetëm dy rrjetat e tundura nga Manaj deri tani si dhe sjellja që trajneri Odo e ka cilësuar të papërshtatshme, e ka kthyer atë në një lojtar të padëshiruar për teknikun. Edhe pse presidenti i klubit, Daniele Sebastiani, tha një ditë më parë se prioriteti ishte të mbahej futbollisti, gazeta e njohur italiane bën të ditur se tashmë gjithçka është e mbyllur.
Bashkë me Akuilani, Zampano, Verre, Koda dhe Muriç, edhe Manaj do të bëjë gati valixhet për t’u larguar nga Peskara. Fillimisht mendohet se destinacioni i tij do të jetë kthimi te Interi, klubi që zotëron kartonin e sulmuesit shqiptar. Por nuk është aspak çudi nëse ai huazohet në ndonjë klub tjetër, për të luajtur rregullisht pasi te zikaltërit do ta kishte të pamundur të gjente hapësira.
