Opozita në Islandë i kërkoi sot kryeministrit Sigurdur Ingi Johannsson një datë të saktë për organizimin e zgjedhjeve të parakohshme legjislative, njoftuan të dy partitë.
Kryeministri i ri i qendrës së djathtë pasoi disa ditë më parë Sigmundur David Gunnlaugsson, ky i fundit i detyruar të japë dorëheqjen pas skandalit të aseteve të tij në parajsat fiskale të publikuara nga “Panama Papers”.
Pas dështimit të mocionit të censurës kundër Johannsson tre ditë më parë, opozita e majtë dhe ajo e qendrës kërkojnë përcaktimin e një date për zhvillimin e procesit zgjedhor, ndërsa qeveria parashikon si kohën më të përshtatshme fillimin e vjeshtës.
“Ajo që u diskutua nga udhëheqësit e opozitës gjatë takimit të sotëm ishte domosdoshmëria e një date fikse për zgjedhjet dhe një listë me çështjet më të rëndësishme që qeveria duhet të shqyrtojë”, njoftoi për median, sekretari i përgjithshëm i Partisë Socialdemokrate, Kristjan Burgess.
