Prej vitit 2018, muxhahedinët iranianë u strehuan në vendin tonë, pas një marrëveshjeje mes qeverisë shqiptare dhe asaj amerikane, duke u dhën atyre statusin e refugjatëve.
Pikërisht nga ky status, këtij grupimi i ndalohet përfshirja në aktivitete politke apo të tjera si ato të sigurisë.
Por si jetojnë anëtarët e MEK?
MEK funksionon si një kult me rregulla strike, që u ndalonin krijimin e një familje. Organizimi i tyre është i tipit ushtarak ku nuk u lejohet martesa apo marrëdhëniet, por e kanë ditën e angazhuar në aktivitet fizik (gjimnastikë) dhe lexim të librave, broshurave të veta.
Një pjesë e të arratisurve nga kampi, të cilët kanë folur edhe më herët për mediat, kanë thënë se ishin joshur nga propaganda në media dhe online e MEK dhe u ishin bashkuar radhëve të tyre. Dëshira e tyre ishte për të kontribuuar në rivendosjen e lirisë dhe demokracisë në Iran, por ishin zhgënjyer.
Ndërkohë ndër të tjera ishin të angazhuar me nxitje propagande online, monitorim të shkrimeve/postimeve që i konsideronin kundër tyre. Dyshohet po ashtu se fshehtazi janë angazhuar edhe në sulme kibernetike ndaj Iranit, apo sipas objektivave që vlerësonin.
Anëtarët e MEK dyshohet se kanë kryer sulme dhe ndërhyrje të paligjshme kompjuterike jashtë Shqipërisë, nga baza e Manzës në maj 2023, duke u bërë shkak për kërcënime të vazhdueshme nga Irani në drejtim të vendit tonë. 6 anëtarë të këtij komuniteti, u proceduan për kundërshtim me dhunë të policisë, gjatë zbatimit të vendimit të gjykatës.
