Nënë e bijë të cilat u gjetën të vdekura në banesën e tyre në Kombinat, Zhaneta Josifi 56 vjeçe dhe Anisa Josifi 30 vjeçe, dyshohet se u vetëflijuan për tu ringjallur, siç sipas tyre parashikonin udhëzimet e sektit “Dëshmitarët e Jehovait”.
Është kjo ajo që është zbuluar nga hetimet e kryera për ngjarjen e zbuluar në banesën në rrugën “Hamdi Cenoimeri”, këtë të enjte, ku krahas dy viktimave u gjet në gjendje të rëndë edhe 34-vjeçarja Blerta Josifi, vajza tjetër e Zhanetës.
Nga ekspertiza mjeko-ligjore në trupin e Anisa Josifit, rezulton se ajo kishte vdekur prej së paku një viti dhe trupi ishte mumifikuar.
Kjo pasi e ëma dhe motra e lyenin me vaj dhe uthull, për të mos lejuar dekompozimin si dhe e kishin mbuluar me batanije.
Anisa Josifi u gjet e vdekur në krevat në dhomën e saj, ndërsa nëna në dhomën tjetër në dysheme. Në gjendje të rëndë u gjet 34-vjeçarja, e cila gjatë marrjes në pyetje dha detajet e para të asaj që kishte ndodhur.
Vajza e mbijetuar Blerta Josifi mësohet se është shtruar në psikiatri, apo spitalin nr.5, siç njihet ndryshe.
E reja ka thënë se bashkë me të ëmën kishin 40 ditë pa ngrënë, pasi donin të provonin ringjalljen.
Familja Josifi njihej si praktikante fanatike e sektit të “Dëshmitarëve të Jehovait”, teksa kryefamiljari i ndarë nga jeta disa vite më parë, njihej si themeluesi i këtij sekti në qytetin e Përmetit prej nga ishin me origjinë.
/a.r
