Një tjetër gjyqatrë largohet pasi nuk ka mundur që të kaloj Vettingun. Komisioni i Pavarur i Kualifikimit shkarkon nga detyra kreun e Gjykatës së Tropojës.
Procesi i Vetingut për Secin u krye nga trupa gjykuese e përbërë nga Roland Ilia, Valbona Sanxhaktari dhe Olsi Komici.
Dritan Seci i cili mbante postin e kreut të Gjykatës me sa duket nuk ka mundur të kalojë tre shtyllat e vettingut.
Seci e ka filluar detyrën si gjyqtar në Gjykatën e Tropojës që në vitin 2004, disa vite më vonë emërohet në krye të këtij institucioni dhe vazhdon ende të kryejë detyrën aty.
Referuar deklaratave të pasurisë, gjyqtari Seci zotëron një apartament dhe një lokal shërbimesh në Bajram Curri, si dhe një apartament në Tiranë.
Gjatë vitit 2018, Seci është përmendur në media si gjyqtari i çështjes kundër ndërtimit të hidrocentralit Dragobia, në Lumin e Valbonës.
Më herët gjyqtari Dritan Seci vendosi të mos pranojë ankimin e shoqatës “Toka”, e cila i ishte drejtuar Gjykatës së Apelit të Shkodrës për të kundërshtuar vendimin për bllokimin e veprimeve përmbarimore.
Pra, e njëjta gjykatë që bllokoi pezullimin e punimeve, vendos që të mos ankimohet vendimi i tij.
PASURIA
Të dhënat e analizuara nga BIRN tregojnë se gjyqtari Dritan Seci nuk zotëronte asnjë pasuri në vitin 2004, kur deklaroi për herë të parë interesat e tij vetjake pranë Inspektoriatit të Lartë të Deklarimit dhe Kontrollit të Pasurive dhe Konfliktit të Interesit, ILDKPKI.
Në fund të vitit 2017, pasuria e tij familjare kap vlerën e 20.1 milionë lekëve me një rritje mesatare vjetore prej 1.4 milionë lekësh. Pasuritë e paluajtshme përbëjnë pjesën kryesore të aseteve me 13.7 milionë lekë. Referuar deklaratave të pasurisë, gjyqtari Seci zotëron një apartament dhe një lokal shërbimesh në Bajram Curri si dhe një apartament në Tiranë.
Ai deklaron gjithashtu në total 5.9 milionë lekë likujditete bankare dhe kursime në cash prej 400 mijë lekësh.
Të ardhurat familjare për periudhën deklaruese janë 33.6 milionë lekë. Rreth 53% e të ardhurave kanë si burim aktivitetin e bashkëshortes si farmaciste, ndërsa paga nga funksioni i gjyqtarit zë 46.8% në buxhetin e familjes.
Përveç analizës për rritjen/uljen e pasurisë, strukturën e aseteve dhe të ardhurave, ky raport paraqet dhe kontrollin aritmetik/logjik të deklarimeve të subjektit si dhe “flamujt e kuq’ që identifikohen gjatë kontrollit. Nga kontrolli aritmetik/logjik rezulton se 14 deklaratat e analizuara janë pa diferenca negative mes të ardhurave dhe shpenzimeve.
Megjithatë, BIRN identifikoi si “flamur të kuq” mosdeklarimin e të ardhurave nga pagat në vitin 2010; ndërkohë që kreu i Gjykatës së Tropojës ka deklaruar kursime familjare në vlerën e 2 milionë lekëve në të njëjtin vit.
