Gjykata Kushtetuese ka dhënë fjalën e fundit. Erion Veliaj do të vijojë të jetë kryetar i Bashkisë së Tiranës, pas shkarkimi me vendim të qeverisë ishte antikushtetues. Me një vendim rekord, vetëm 3 ditë pas shqyrtoi ankimin e Veliajt në seancën maratonë, Kushtetuesja ka vendosur në favor të kryebashkiakut me 5 vota pro dhe 3 kundër. Po, ashtu Kushtetuesja ka shfuqizuar edhe dekretin e presidentit Bajram Begaj për shpalljen e zgjedhjeve në Tiranë.
Kushtetuesja argumenton se shkarkimi i Veliajt mund të bëhet vetëm në bazë të nenit 115 të kushtetutës, pra vetëm për shkelje të rënda të Kushtetutës. Pra, Gjykata ka vlerësuar se Këshilli Bashkiak dhe Qeveria kanë vepruar në shkelje të Kushtetutës kur e ka shkarkuar Erion Veliajn me argumentin se nuk u paraqit 3 muaj në detyrë, duke iu referuar nenit 62 gërma c të ligjit për vetëqeverisjen vendore.
Trupa prej 8 anëtarësh në Kushtetuese, në mënyrë unanime, ka vlerësuar se është Kushtetuesja që ka juridiksion të plotë për të vendosur për shkarkimin e një të zgjedhuri vendor, si garanci që pushtetet ndahen dhe bashkitë janë autonomi vendore.
Një tjetër shkelje që ka evidentuar Gjykata Kushtetuese është se Këshilli Bashkiak dhe Qeveria nuk garantuan proces të rregullt ligjor pasi kryebashkiaku Veliaj nuk u ftua, dëgjua dhe nuk u mbrojt dot.
Vendimi i Kushtetueses në favor të Veliajt vjen pas përballjes mbi 7 orë seancën publike të 31 tetorit, ku ishte i pranishëm edhe vetë kryebashkiaku i cili u përball me kryeministrinë dhe presidencën, njëra që firmosi shkarkimin e tij, e tjetra që dekretoi zgjedhje në kryeqytet.
Me argumentin se nuk u paraqit 3 muaj në detyrë, Këshilli Bashkiak i Tiranës propozoi shkarkimin e Veliajt, vendim që u mor më datë 25 shtator nga qeveria me firmë të vetë kryeministrit Rama.
