Të gjithë tifozët e Juventusit mezi po presin ditën e hënë, kur do të shohin për herë të parë Cristiano Ronaldon të veshur me fanelën bardhezi.
Një ngjarje historike për të cilën po flasin të gjitha mediat italiane dhe që imagjinohej që të ndodhte në një Allianz Stadium të mbushur plot me tifozë, ashtu siç u prezantua portugezi te Reali në vitin 2009.
Por nuk do të jetë kështu. Juventusi ka njoftuar zyrtarisht se programi i ditës së hënë do të jetë identik si prezantimi i çdo futbollisti tjetër: vizitat mjekësore në J-Medical, konferencë shtypi dhe prezantim.
Klubi po mendonte që të organizonte një prezantim me tifozë, por në fund preferoi që të shmangte hapjen e portave të stadiumit.
