Një aksident i rëndë ka ndodhur rreth mesnatës në Fushë-Prezë ku katër djem të rinj humbën jetën pasi automjeti i tyre tip Mercedes-Benz S-Class u përplas me një betoniere dhe shpërtheu në flakë. Fatkeqësisht, të rinjtë që mbetën të bllokuar në mjeti, u dogjën brenda makinës.
Gazetari i Klan News, Besar Bajraktaraj ka sjellë detaje të reja nga ky aksident tragjik ku shprehet se në vendngjarje nuk ka shenja frenimi, çka tregon se drejtuesi i mjetit nuk ka frenuar fare dhe më pas ka përplasur nga pas betonieren.
Benzi i të rinjve ka qenë me shpejtësi tejet të madhe. Ndërkohë pritet ekspertiza e ekspertëve për të përcaktuar shpejtësinë që ka patur mjeti me 4 viktimat brenda.
Nga ana tjetër gazetari bën të ditur se drejtuesi i betonieres nuk ka patentë për drejtimin e mjetit të rëndë. Po ashtu ekspertët presin gjithashtu përgjigjen nga mjekësia ligjore për të parë nëse të rinjtë kanë qënë nën efektin e alkoolik apo të lëndëve narkotike.
Ndërkohë sa i përket dinamikës së aksidentit pranë vendit të ngjarjes, në afërsi të një karburanti ndodhet një biznes në anën e Rinasit që prodhon beton. Betonierja pasi ishte mbushur, ka dalë në rrugë dhe është nisur në drejtim të Fushë Krujës. Nuk ka lëvizur më shumë se 20 metra kur ka ndodhur përplasja fatale.
Makina me 4 të rinjtë ka ardhur me shpejtësi shumë të lartë nga ana e Vorës dhe e ka goditur nga prapa betonieren, dhe menjëherë ka shpërthyer në flakë pasi makina ka qenë me impiant gaz-benzinë.
