Ministria e Financave ka publikuar para disa ditësh kuadrin makroekonomik e fiskal për periudhën 2017 – 2019, ku janë dhënë shifrat e shpenzimeve dhe parashikimeve për periudhën afatmesme.
Ajo që bie në sy është fakti se për këtë vit nuk është parashikuar asnjë lloj rritjeje pagash për pensionet apo për administratën. Rritja e vetme për pensionet është shënuar për vitin 2019, ku në zërin Politika të Reja Pensionesh është parashikuar një fond prej 1.4 miliardë lekësh. Sakaq për këtë vit dhe për dy të tjerët që do e pasojnë nuk ka asnjë fond për rritjen e pensioneve.
Shpenzimet për vitin elektoral 2017 në rritje
Ndryshe është panorama në lidhje me shpenzimet kapitale të qeverisë, të cilat kanë një rritje për vitin e ardhshëm, i cili është dhe një vit elektoral. Rritja është e dukshme, rreth 4 miliardë lekë më shumë se në këtë vit( nga 59,988 në 2016- 64,317 në 2017), ndërsa më pas trendi ulet për 2018 me një vlerë shtesë prej 1.5 miliardë lekësh.
Pagat e Administratës, asnjë politikë për vitin 2016
Ndërkohë, politika për rritjen e pagave të administratës janë në vend numëro. Për këtë vit nuk parashikohet asnjë rritje për pagat e administratës, por vetëm në vitin 2017 është liruar një fond i vogël prej 1 miliardë lekësh, ndërsa në vitet 2018 e 2019 ka një rritje të lehtë, përkatësisht 1.5 mld dhe 2 mld lekë.
Pritshmëria për rritjen ekonomike
Qeveria është detyruar sërish që të ulë treguesin e rritjes ekonomike për periudhën afatmesme 2017-2019, në krahasim me vlerësimet e saj në verën e viti të kaluar. Treguesit për vitin që lamë pas kanë pësuar rënie me 0.1 % nga vlerësimi për një rritje ekonomike prej 2.7%. Por edhe parashikimet për vitet 2017 dhe 2018 janë përsëri në një tendencë rënëse, pavarësisht se vetëm me 0.1%.
Parashikimi për borxhin
Përsa i përket borxhit publik, me politikat dhe buxhetin e ri parashikohet një ulje pozitive e pritshmërive për rënien e nivelit të tij, nga 71% në 70.9%. Ajo çfarë nuk shpjegohet dhe është disi e paqartë është fakti se një borxh në rënie normalisht do të nënkuptonte një tendencë pozitive të rritjes ekonomike.
