Komisioneri Publik ka ankimuar vendimin e Komisionit të Pavarur të Kualifikimit për gjyqtarin e Gjykatës Kushtetuese, Bashkim Dedja.
Ankimimi i Komisionerit vjen pas kërkesës së Operacionit Ndërkombëtar të Monitorimit.
Gjyqtari Bashkim Dedja kaloi në sitën e Vettingut dhe KPK-ja e cilësoi si të përshtatshëm në të trija shtylla e hetimit.
Në 13 qershor, KPK dha vendimin, ndërkohë që pritet hapi i radhës nga Kolegji i Posaçëm i Apelimit.
Njoftimi i plotë
Sot, më datë 26.7.2018, Komisioneri Publik, në ushtrim të funksionit të tij kushtetues, depozitoi pranë Komisionit të Pavarur të Kualifikimit ankimin ndaj vendimit nr. 24, datë 13.6.2018, për subjektin e rivlerësimit z. Bashkim Dedja.
Komisioneri Publik, pasi shqyrtoi vendimin e mësipërm të Komisionit të Pavarur të Kualifikimit, si dhe mori në konsideratë rekomandimin e paraqitur nga Operacioni Ndërkombëtar i Monitorimit për të paraqitur ankim, vlerëson se bazuar në provat dhe faktet e administruara nga Komisioni i Pavarur i Kualifikimit, subjekti i rivlerësimit, z. Bashkim Dedja, nuk arrin një nivel të besueshëm në vlerësimin e pasurisë.
Nëpërmjet këtij ankimi, Komisioneri Publik kërkon nga Kolegji i Posaçëm i Apelimit të marrë në shqyrtim çështjen në seancë gjyqësore dhe në përfundim të gjykimit të ndryshojë vendimin nr. 24, datë 13.6.2018, duke vendosur shkarkimin nga detyra të subjektit të rivlerësimit z. Bashkim Dedja, kryetar i Gjykatës Kushtetuese.
/b.d
