Deputeti i Partisë Socialiste, Erjon Malaj ka deklaruar se nuk ka fare diskutim për qeveri teknike, siç ka kërkuar vazhdimisht opozita. Sipas tij, mazhoranca është e fokusuar te zgjedhjet vendore të vitit 2027 dhe ato të përgjithshme të vitit 2029.
Duke folur në emisionin “Tema e Ditës” të Arbër Hitajt në RTSH1, Malaj ka shpjeguar se kjo temë nuk diskutohet aspak në grupin parlamentar të Partisë Socialiste.
“Është një temë që nuk ekziston në grupin parlamentar të Partisë Socialiste. Po të them dhe pse? Që një forcë politike të ketë 83 mandate dhe të jetë në këtë pikë ku është sot Shqipëria me të gjithë grupkapitujt që tashmë janë hapur dhe ne jemi në një proces të tillë ku kemi marrë zotime brenda vitit 2027 nuk diskutohet fare kjo tematikë”, u shpreh Malaj.
Ai vuri në dukje se kjo është një axhendë e Partisë Demokratike e cila kërkon të çojë përpara axhendën e saj politike.
“Kjo është një çështje politike, një narrativë politike e opozitës për të mbajtur zgjuar elektoratin e saj që të shtyjë përpara në ato pak protesta që kanë bërë me idenë që; nëse vazhdojmë kështu, shumë shpejt mund të kemi zgjedhje, do të kemi qeveri teknike. Të parët që e dinë që kjo narrativë politike nuk funksionon dhe nuk ekziston është vetë Partia Demokratike”, ka theksuar më tej Malaj.
Malaj shpjegoi gjithashtu se Partia Socialiste punon çdo ditë dhe përgatitet vazhdimisht për zgjedhjet e ardhshme.
“Është çdo ditë në punë për zgjedhjet e ardhshme. Kjo është një gjë që e kisha dëgjuar por vetë nuk e kisha besuar. Ndërkohë që sot, ne çdo ditë kemi diçka për zgjedhjet që do të vijnë. Në mos një trajnim, një takim, një konferencë, një tryezë e përbashkët me qytetarët. Prandaj iu bën çudi forcave të tjera politike që kur vjen dita e zgjedhjeve dhe thonë; Si ka mundësi! Jo, ka mundësi, se nuk punojmë 3 muajt e fundit”, nënvizoi deputeti Malaj.
