Nga ARTUR AJAZI
Mitingjet dhe tubimet fallco, nuk e sjellin kurrë në pushtet Berishën. As premtimet dhe propaganda buzë tregjeve të fruta-perimeve, nuk e sjellin kurrë në pushtet Berishën. Aq më tepër, as vajtja në Gjermani dhe pjesëmarrja në kongresin e CDU-së, nuk e sjellin kurrë në pushtet Berishën. Gjithashtu as ulurimat e belindëve mes Tiranës, dhe ulurimat e militantëve në dyert e Bashkisë Tiranës, nuk e sjellin kurrë në pushtet Berishën.
Të marrësh pushtetin në një vend si Shqipëria në 2025, duhet të plotësosh disa kritere, që lidhen edhe me të shkuarën tënde si politikan dhe ish-pushtetar. Si mendoni ju zoti Berisha, se mund të vini në pushtet sërish në Shqipëri, pas gjithë atyre akuzave, dosjeve penale, apo dhe goditjeve që keni marrë nga brënda partisë tuaj ? Duke bërë fushatë si në 1996, 1997, apo në 2005 ? Ka ikur koha kur kryeministrit i kujtoje “ke pirë wisky apo verë 100 vjeçare, dhe je i korruptuar, duhet të largohesh”. Ka ikur koha kur dilje mes Tiranës, dhe hidhje flakadanë në rreshtat e policëve, dhe trembej dynjaja.
Sot ka ardhur koha e fjalës dhe premtimeve të mbajtura. Ka ardhur koha e programeve reale, pa shtesa dhe arrnime, ka ardhur koha e fushatave origjinale, dhe jo të trukuara. Mundohu të kopjosh paksa nga Edi Rama, edhe pse nuk e ke fatin ti ngjasosh atij. Ndrysho mentalitetin tek stafi dhe shpura që mban pas vehtes, sepse nesër do të jetë e vështirë, të bëni ribashkimin dhe riorganizmin e partisë tuaj. Takimet me CDU-ra, CUD-ra, apo me çfardolloj parti dhe koalicioni djathtist në Europë, nuk japin fitoren në Shqipëri zoti Berisha. As takimet me ndonjë kancelar apo dhe president shteti, nuk bëjnë më efektin që bënin dikur, asokohe kur shqiptarët i shihnin ata si “shenjtorë”.
Fitoren ta japin punët e bëra, premtimet e realizuara, fjalimet pa parathënie dhe prapathënie politike, dhe njerëzit me mentalitet qytetar, të zhveshur nga sindromi i inferioritetit apo delirantit.
Një grupim politik siç është partia, natyrisht ka synime të qarta drejt pushtetit, qoftë kjo edhe e sapokrijuar. Kështu që edhe Partia Demokratike, bën mire, dhe gjithë të drejtën e saj, si forcë politike, të ketë ambicje ndaj pushtetit. Por ka ca rregulla të shkruara dhe të pashkruara, që nuk mund të injorohen.
Nuk mund të vish sa here të duash në pushtet, kur ke mbrapa “fatura të papaguara” ndaj popullit dhe drejtësisë. Ndaj mendoj dhe besoj se, asnjë takim dhe kongres jashtë kufinjve të Shqipërisë, nuk mund ti shtojnë PD-së aktuale shansin e ardhjes sërish në pushtet, sa kohë kryetari i saj, është ai që ka qenë, dhe sa kohë brënda asaj partie nuk duket asnjë reflektim pozitiv për shlyerjen e “faturave të papaguara” qysh nga koha kur ajo ishte në pushtet.
