Skuadra që fiton nuk ndryshon. Po flasim për Islandën, jo për Francën e Deshampit që është në dyshime të mëdha për modulin me të cilin duhet të zbresë sot në fushë përballë skuadrës që askush nuk e priste në çerekfinalet e Europianit.
Fajin për këtë e kanë edhe mungesat: në mbrojtje nuk është Rami, i skualifikuar dhe as Kante në mesfushë. Kështu që trajneri francez duhet të vendosë t’i besojë 4-3-3 të zakonshëm apo të hedhë në fushë një 4-2-3-1 që i lejoi të përmbyste Irlandën në 1/8-at. Por, ai nuk e përjashton as një 4-4-2, ndonëse në fushë do ishin të njëjtët titullarë.
Rreziqet – “Kam variante të ndryshme në mendje, – shpjegon Deshamp në konferencë, duke shmangur të tregojë diçka më tepër. Dhe mund të ndryshoj më shumë se në të shkuarën, sepse gjatë turneut duhet të dish të përmirësohesh, duke besuar te lojtarë që mund të nisen nga stoli për të krijuar rreziqe”.
Këto ditët e fundit Franca ka blinduar stërvitjet, duke shmangur përhapjen e lajmeve siç ishte ajo në 1/8-at kundër Irlandës, ku u zbulua se Pogba ishte zhvendosur në të djathtë, një eksperiment që dështoi në pjesën e parë dhe që e bindën Deshampin ta rikthente juventinin në qendër së bashku me Matuidinë në pjesën e dytë.
Në atë fraksion loje, Grizman përmbysi rezultatin. Dhe tani mediat franceze këmbëngulin që të luhet me të njëjtin modul fitues dhe këtë nuk e përjashton as tekniku që mund të rreshtojë edhe një klasike 4-4-2 me Pajenë dhe Komanin në krahë.
Forca – Por ndaj Islandës nuk do shërbejë vetëm taktika, por edhe forca fizike dhe psikologjike. Edhe pse skuadra e Lagerbakut vjen në sfidën e San Denisë pa stresin e presionit.
“Kanë ardhur në çerekfinale me meritë, lojtarët e mi janë plotësisht të ndërgjegjshëm për këtë. Duhet të bëjmë kujdes nga topat e tyre të gjatë.
Topat e gjatë nga 35-40 metra janë si goditje dënimi për ta dhe duhet t’i ndalim. Por ata janë të aftë të luajnë edhe me topin në tokë. Islanda meritoi ta mundte Anglinë. Penalltitë?! Unë s’i stërvit kurrë lojtarët për penallti.
Disa mund të qëndrojnë pas stërvitjes dhe t’i praktikojnë, por për qejf. Sepse unë nuk e stërvit kurrë skuadrën për to”, theksoi Deshamp./Panorama/a.k
