Raportet mes çamëve dhe socialistëve vijojnë të mbeten të zymta. Paralajmërimit të fundit të Shpëtim Idrizit, për një largim të mundshëm nga koalicioni qeverisës, pavarësisht se ka marrë drejtoritë më të rëndësishme, shefi i qeverisë i është përgjigjur negativisht. Molla e sherri nuk janë parimet, as çështjet me karakter kombëtar, por është një ministri. Sipas versionit të deputetëve të PDIU, shefi i qeverisë i ka premtuar Shpëtim Idrizit një ministri, pas zgjedhjeve lokale të 2015, gjithnjë nëse PDIU do të fitonte në të gjitha njësitë vendore, ku u përfaqësua me kandidatë.
Ndërkaq, sipas versionit të PS, portofolet ministrore nuk mund të ndahen me një subjekt politik, i cili, në zgjedhjet e fundit parlamentare, ka qenë pjesë e koalicionit kundërshtar. Gjithsesi, çamët shkojnë më tej, duke thekuar se shefi i qeverisë u kishte premtuar një ministri të re, pikërisht atë të Diasporës, menjëherë sapo të ndryshonte kabineti qeveritar. Kësisoj, pas presionit me braktisjen e votimit të projektligjeve në Parlament, duke vënë në pozita të vështira mazhorancën, kreu i PDIU paralajmëroi publikisht se mund të largohet nga koalicioni.
Bisedimet
Burime pranë grupit të deputetëve të PDIU, pohojnë se pas kësaj deklarate, ka patur kontakte dhe bisedime mes dy palëve. Gjithsesi, përfaqësuesit e socialistëve mësohet se kanë qenë të prerë për të mos u dhënë çamëve një portofol ministror, por PS ka lënë të hapur mundësinë pas zgjedhjeve parlamentare të 2017, nëse PDIU do t’i bashkohet koalicionit të së majtës. Nga ana tjetër, kreu i PDIU këmbëngul në zbatimin pikë për pikë të marrëveshjes parazgjedhore.
Lëvizja
Përpos shtatë drejtorive të rëndësishme, PDIU kërkon qeverisjen e një ministrie. Kjo e fundit do të ndikonte për të maksimalizuar votat në 2017. Por, në kushtet humbjes së një pushteti të tillë, PDIU po sheh mundësinë e projektimi të një Poli të Tretë, i cili mund t’u imponohej dy koalicioneve kryesore, në rast të një rezultati shumë të ngushtë. Sipas burimeve, kreu i PDIU, Shpëtim Idrizi ka nisur kontaktet me aktorë të ndryshëm politikë, në kuadër të projektit të ri politik. Mbetet për t’u parë nëse kjo lëvizje do të finalizohet me bashkimin disa partive politike, duke krijuar kësisoj Polin e Tretë, apo kemi të bëjmë thjeshtë me një presion politik.
Rrethanat
Janë disa parti politike, me peshë reale në elektorat, të cilat mund t’i bashkohen Polit të Tretë. Aleanca Kuq e Zi dhe Partia Demokristiane nuk janë sot pjesë e një koalicioni. Po ashtu, e lëkundur është edhe Fryma e Re Demokratike. Kjo e fundit ka deklaruar se pret një ftesë edhe Partia Demokratike. Edhe disa parti, të tjera, të rreshtuara majtas dhe djathtas, kanë shprehur vullnetin për Polin e Tretë.
Shpëtim Idrizi
“Qëllimi ynë është padyshim që të qëndrojmë në këtë bashkëqeverisje për të përçuar kauzat dhe interesat tona, mirëpo nëse ne nuk na duan atëherë ne nuk kemi më dilema. Përpara kauzave ne nuk vendosim asgjë”.
Mesazhi i Ramës
Disa ditë më parë, kryeministri Rama i dha një mesazh Idrizit, teksa ftoi Vangjel Dulen në PS, duke i premtuar se do ta miqësonte me Idrizin. “Eja në PS se do të të bëj mik edhe më Shpëtim Idrizin”, u shpreh Rama.
Report TV
