Skandali i Panamasë dhe përfshirja e firmës së markimit të karburanteve në Shqipëri është bërë pjesë e diskutimeve të sotme në mbledhjen e Komisionit të Ekonomisë.
Diskutimi është hapur nga kreu i këtij komisioni, Erion Braçe, i cili gjatë raportimit të drejtoreshës së Autoritetit të Konkurrencës, Lindita Lati, e pyeti këtë të fundit lidhur me transparencën e kompanisë “GFI Albania”.
“Në vitin 2015, kompania “GFI Albania” ndryshoi kuotat e aksioneve. Sa transparente ishte shitja e aksioneve nga kompania themeluese?”, tha Braçe.
Ndërsa Lati u përgjigj se Autoriteti i Konkurrencës nuk ka informacion të pasqyrave financiare të kompanisë “GFI”.
“Nuk kemi informacione të pasqyrave financiare të “GFI Albania”. Janë firma off-shore, nuk gjejmë dot të dhëna për xhirot. Ligji s’na jep mundësi të kontrollojmë treguesit e tyre”, tha drejtoresha e Autoritetit të Konkurrencës.
“Shtatë ekstrakte të shtatë kompanive të ndryshme të lidhura me personat që përmendët dhe të mos kuptoj se kush është pronari, në dokumenta zyrtarë të shtetit shqiptar, kjo është e tepërt. Jo vetëm që nuk ka lidhje fare me transparencën, por ky është një akt që duhet të marrë fund. Kemi ndërtuar një qendër publike të regjistrimit të bizneseve për të patur transparencë mbi pronësinë e këtyre kompanive, për më tepër kur bëhet fjalë për marrëveshje koncesionare të votuara dhe në parlament një pjesë. Dhe që gjithmonë jemi në kushtet kur nuk dimë kush është pronari. Nuk është vërejtje thjesht për juve, është vërejtje për ekzekutivin në radhë të parë që nënshkruan marrëveshje. Mezi po e pres nënkryetarin tim, të vijë të më thotë se kush është pronari i GFI, që të dimë se kujt i paguajmë para ne qytetarët e Shqipërisë”, tha Braçe.
