Kryeministri turk Ahmet Davutoğlu ka dhënë dorëheqjen nga posti i tij, për t’i hapur rrugë formimit të qeverisë së re.
Dorëheqja u pranua nga presidenti Recep Tayyip Erdoğan, i cili i kërkoi Davutoğlu, të qëndrojë në post deri në formimin e kabinetit të ri.
Vendimi erdhi pas zgjedhjeve të përgjithshme të së dielës.
Partia e Erdoğan u rendit e para, por pa siguruar numrin e mjaftueshëm të deputetëve për të formuar e vetme qeverinë.
Në ditët në vijim do të nisin bisedimet me partitë politike në vend për krijimin e një koalicioni qeverisës.
Rezultati i zgjedhjeve
Rezultati i zgjedhjeve të së dielës tregoi se asnjë nga partitë nuk mund të krijojë qeverinë e vetme, ku minimalisht duhen 279 deputetë për të formuar maxhorancën e parlamentit turk. Edhe pse me më shumë vota në këtë garë elektorale, Partia për Drejtësi dhe Zhvillim ka mundur të fitojë vetëm 257 vende në Asamblenë e madhe Kombëtare.
Kjo flet për një rënie besueshmërie me 9% nga zgjedhjet e vitit 2011, çka e privon Erdoganin nga ambicia për të qeverisur vendin i vetëm.
Tabela e numërimi të kutive të votimit nxori në vendin e parë, me afërsisht 41%, partinë e Taip Erdogan, në vend të dytë me 25% partinë republikane, e ndjekur nga partia nacionaliste me 16.6%, si edhe në fund, por jo më pak e rëndësishme në këtë proces zgjedhor, është partia pro kurde, e cila e ka thyer edhe pritshmërinë e vetë aktivistëve të saj, pasi ka marrë afërsisht 12.8% të votave, rezultat ky që i jep mundësinë pro-kurdëve të kenë 80 deputetë si përfaqësues të tyre në Parlament.
