Nga Bajram Peçi
Këto ditë fund-gushti, kur “do ta shihni”, siç na kërcënon I. M tre herë në ditë në të katër TV-të e mediat e mikut bejlliu, është shfaqur pasiguria e dukurive: është apo nuk është kështu siç duket?
Ndërsa shtiret sikur i ka bërë kombit shërbime te vyera, shkon jetën me ëndrra të pëlqyera dhe ka frikë të zgjohet, se rron në botën e tij. Truri i ëndërronjësit I.M ska turp se ndodhet i rrethuar nga një varg problemesh, nga të cilat do ta kete të vështirë se del pa u lagur. Nuk është ashtu siç duket-u thotë dhe u bën thirrje “të ndershmëve”, që të mblidhen rrotull tij, ku i presin shokë “armësh”, të ushqyer e të veshur mirë, pasi e përdhosën dhe shkelën Shqipërinë sa mundën!
Spiunët e këtij muaji u dukën dhe u quajtën blogeristë ose anasjelltas, blogeristët u quajtën spiunë. Një spiune ruse (e vërtetë tashmë), Olga Kolobova, pasi joshi si Mari Adela një dyzinë syresh bukuroshësh të shtabit të NATO-s në Napoli për t’i bërë vizita “kortezie” në shtëpi, u zbulua se nuk ishte shitëse bizhuterish të shtrenjta, siç shfaqej, por një agjente e kualifikuar për të zbuluar të dhënat e aleancës në lidhje me Kosovën.
Një zbulim tjetër habiti ish banorët e Shtëpisë së Bardhë se një vajzë që paraqitej e dukej si Rothschild, dyshohet seriozisht se paska qenë një agjente e Rusisë.
Më tej, publikut “të ndershëm” i kërkohet të besojë se ata të SPAK-ut nuk quhen prokurorë, por spurdhjak e karagjoza; se partia e familjes do ketë synim jo integrimin, si deri tani, por diçka që duket më joshëse, më të madhe se integrimi, lirinë e shqiptarëve nga spurdhjakët.
Ju ndërmendet lexonjës i nderuar se si mediat tona ju ngjitën këto javë si sëmundje lajmeve për kryeministren e “shthurrur” të Finlandës. Duket në sipërfaqe si një shqetësim i shoqërisë që kjo grua i lejon vetes te ndotë postin e lartë me sjellje të pahijshme, me kërcime seksuale joshëse, nën efektet e konsumit të drogës, etj. Mirëpo është e pranishme një gazetare nga një tjetër media që dyshon se disa media paguhen nga agjencia ruse e inteligjencës, GRU-ja, për shpërndarjen e amplifikimin e stisjee keqdashëse të blogerave rusë ndaj kryeministres e shumë lajmeve të tjera që përcjellin te viktimat. Finlanda në NATO, me kërkesë të kryeministres Sanna Marine, kundërshtuar rreptë nga Rusia?! Më e pakta që mund t’i stisin në sulmet e përgojimit, janë këto mediat që llapin, nxisin opinione e shpërndajnë parreshtur agresivitet!
Duket sikur mediat jetojnë me dhjamin e tyre, por disave u duket (dhe afrojnë dëshmi) se gazetarë të veçantë figurojnë në listat e Shërbimit Informativ Kombëtar të Greqisë (EYP). Rusët tani paskan filluar, por fqinjët tanë të dashur me sa duket kanë vite që e ushtrojnë këtë praktikë. Kështu duket, por nuk është ashtu siç duket (?)!
E për ta mbyllur me stinën e begatë të dukurive ndryshe, sjellim qershinë mbi tortë: Autoriteti për Informimin mbi Dokumentet e ish-Sigurimit të Shtetit në Shqipëri thotë se ish-presidenti Ilir Meta e ka patur mbiemrin Metaj. Nuk është puna e “J”-së fundore, por çështja është se ky Iliri me “J” në fund, duket se qënka ish-presidenti, që ka qenë bashkëpunëtor i Sigurimit në kohën e komunizmit. Dosja duket se kështu është, por I.M-ja thotë se nuk është ashtu siç duket!
Vjen nga seneka një thënje e bukur për kohën e humbur: “humbja më e turpshme është ajo që vjen nga pakujdesia jonë”. Vetëm një tru u sëmurë ska zotësinë të kuptojë se koha e tij ka mbaruar.
