Nga Namir Lapardhaja
Pas zgjedhjeve të 11 Majit, dukej se gjithçka po shkonte ‘mbarë’ në Partinë Demokratike.
Retorika e vjedhjes, e mosnjohjes së qeverisë dhe e mbrojtjes së votës së lirë vijonte në rrjedhje të lirë, por nuk shqetësonte askënd.
Të gjithë deputetët e PD-së, edhe ata që duhen me njëri-tjetrin, edhe ata që urreheshin, e vetmja gjë për të cilën binin dakort është se të gjithë janë përgjegjës për humbjen, vetëm Berisha jo.
Në këtë kontekst, SPAK dhe GJKKO kanë vijuar punën e tyre për qeverinë, mirëpo, në vend të mbështetjes, Berisha dhe të tijët kanë vijuar me teoritë e organizatës kriminale dhe të një drejtësie të kapur prej Edi Ramës.
Pavarësisht akuzave dhe sulmeve ndaj qeverisë, opozita ishte ulur me të për ngritjet e një komisioni për Reformën Territoriale dhe një për atë Zgjedhore. Pra, gjithçka po ‘funksiononte’ për mrekulli.
Këtë qetësi duket se e prishi Ervin Salianji, i cili, edhe pse me një lëvizje të beftë dhe të paqartë përsa i takon asaj që pret dhe së ardhmes, filloi të organizojë disa takime me struktura dhe mbështetës të PD-së në rrethe.
Kaq ka mjaftuar që PD-ja të ‘zgjohet’ e tromaksur, të lëshojë një urdhër organizimi të brendshëm për të gjetur fajtorët e humbjes, ka filluar takimet në bazë, ka thirrur Këshillin Kombëtar, i ka vendosur Salianjit ‘vijat e kuqe’, duke i treguar praktikisht ‘derën’ e partisë dhe këtë të enjte ka zhvilluar një shfaqje siç vetëm Berisha dhe PD dinë ta bëjnë kur janë në halle të tilla.
Në këtë panoramë të përgjithshme, pavarësisht se ‘motivi’ duket se është Balluku, në të vërtetë është lëvizja e Salianjit brenda PD-së. Nuk po i tregojnë ‘forcën’ qeverisë, por muskujt Salianjit, për t’i thënë që jemi ne këtu.
Nëse do ta kishin me Ballukun dhe me Ramën, duhet të mbështesnin Prokurorinë e Posaçme dhe SPAK-un, jo t’i quanin organizatë kriminale dhe t’i akuzonin si shërbëtor të pushtetit ose të shkojnë në Këshillin e Mandateve dhe të kërkojnë atë që duhet të kërkojnë në përputhje me ligjin dhe kërkesën e Prokurorisë.
Nëse do ta kishin me Ballukun dhe qeverinë, nuk do ta prishin seancën, por të të kudeseshin që gjithçka të shkonte mbarë, në mënyrë që t’i sqaronin shqiptarët se çfarë ka ndodhur, çfarë pritet të ndodhë dhe në çfarë pozite dhe qëndrimi është opozita në gjithë këtë që ndodh.
Por jo! Zgjodhën të tregojnë ‘muskujt’ ndaj Salianjit, që të marrë vesh ai se këtu është Saliu dhe Muli, njëri që fluturon mbi kokat e gardistëve për të zënë karriget e ministrave dhe tjetri që mjafton të japë një urdhër për të shkaktuar atë kaos parlamentar.
Ja kaq është e gjitha! Shfaqja vijon.
