Ka nisur këtë pasdite marshimi i qytetarëve në kuadër të ditës së 16-të të protestës për Zvërnecin. Protestuesit u mblodhën fillimisht në qendër të Tiranës dhe më pas nisën marshimin përgjatë bulevardit “Dëshmorët e Kombit” drejt godinës së Kryeministrisë.
Organizatorët njoftuan se pas fjalimeve para Kryeministrisë, protestuesit do të vijojnë marshimin në disa rrugë të kryeqytetit.
“Marshimi është organizuar nga vetë të rinjtë, por nga sot do kujdesemi edhe për të për të shmangue incidentet e mbrëmshme. Nuk do të ketë më marshim jashtë ‘Unazës’, u shpreh aktivisti Kola.
Gjatë tubimit, ata u bënë thirrje pjesëmarrësve të ruajnë qetësinë dhe të shmangin incidentet, duke theksuar se itinerari i marshimit do të zhvillohet brenda perimetrit të Unazës së Tiranës.
Tubimi vjen një ditë pasi protestuesit zhvilluan marshimin më të gjatë që nga nisja e lëvizjes, duke vijuar deri në orët e para të mëngjesit. Një grup pjesëmarrësish u drejtua mbrëmjen e kaluar drejt Aeroportit të Rinasit, por marshimi u ndalua nga forcat e policisë.
