Kryeministri Edi Rama ka prezantuar një tjetër metodë të asaj që ai e quan ‘Mekanizmi Bashkëqeverisjes me Njerëzit e Zakonshëm’. Bëhet fjalë për një tjetër sistem online ku qytetarët mund të japin vlerësimet e tyre për institucionet, zyrtarët, apo nëpunësit e sporteleve të shërbimit shtetëror.
Sipas këtij sistemi, çdo qytetar do të mund të vendosë notën e tij pas marrjes së shërbimit. Mbi bazën e vlerësimeve do ketë shpërblime për ata që shkëlqejnë por edhe penalizime për ata që vlerësohen dobët.
Postimi i Ramës:
NOTA JUAJ
Ju lutem hidhini një sy dhe mundësisht shkruani çfarë mendoni
🙏:
Një ndër mekanizmat e rinj të Bashkëqeverisjes me Njerëzit e Zakonshëm, që po studiojmë të fusim në funksionim me krijimin e qeverisë së re, do të jetë mekanizmi i notës për shërbimin e marrë.
Çdo institucion, zyrë, sportel, që u shërben qytetarëve do të jetë i gjykueshëm nga çdo qytetar/e që do të dëshirojë të vendosë notën e tij/saj (nga 1-10) pas marrjes së shërbimit.
Nga notat e qytetarëve do të gjenerohet periodikisht një notë mesatare e cila do të bëhet publike. Ky vlerësim do të mundësojë informimin në kohë reale të publikut dhe të qeverisë, për nivelin e pëlqyeshmërisë së shërbimit në çdo zyrë a sportel të shtetit në rang republike.
Përmes këtij vlerësimi, do të dalë edhe një koeficient për vlerësimin zyrtar të çdo drejtuesi të një institucioni shërbimesh, në nivel qendror apo vendor. Mbi bazën e këtij koeficienti do të ngrihet edhe një seri masash administrative, që nga shpërblimet e fundvitit për ata që shkëlqejnë, tek penalizimet përkatëse për ata që nuk e kalojnë provimin e publikut
