Autoritetet norvegjeze kanë sekuestruar një anije ruse në arkipelagun arktik të Svalbardit, me kërkesë të kompanisë shtetërore ukrainase të energjisë Naftogaz, në kuadër të përpjekjeve ndërkombëtare për të siguruar pagesën e një dëmshpërblimi arbitrazhi prej 4.22 miliardë dollarësh.
Masa është marrë ndaj anijes “Professor Molchanov”, e cila përdoret për lundrime turistike dhe ekskursione, përfshirë edhe në zonën e Svalbardit. Sekuestrimi u urdhërua pas një vendimi të Gjykatës së Qarkut Nord-Troms të datës 31 gusht, bëri të ditur guvernatori i Svalbardit, Lars Fause.
Sipas tij, anija nuk lejohet të largohet nga vendndodhja e saj aktuale në Barentsburg. Dëmshpërblimi lidhet me një vendim të vitit 2023 të një gjykate arbitrazhi në Hagë, e cila urdhëroi Rusinë t’i paguante Naftogaz-it 4.22 miliardë dollarë për konfiskimin e paligjshëm të aseteve të saj energjetike në Krime, përfshirë vendburime gazi dhe infrastruktura energjetike, pas aneksimit të gadishullit nga Rusia në vitin 2014.
Moska ka refuzuar të paguajë dëmshpërblimin dhe për këtë arsye Naftogaz ka nisur procedura ligjore në gjykatat e disa vendeve, me synim sekuestrimin e aseteve tregtare ruse.
“Ky është një tjetër hap i rëndësishëm drejt rikthimit të drejtësisë për përvetësimin e paligjshëm nga Rusia të aseteve të Naftogaz-it në Krime. Rusia nuk mund t’u shmanget përgjegjësive të saj thjesht duke refuzuar të zbatojë një vendim ndërkombëtar arbitrazhi. Ne do të vazhdojmë të ndjekim asetet ruse në të gjithë botën”, deklaroi Sergii Fedorenko, drejtor ekzekutiv i Naftogaz.
